சென்னையில், கிராண்ட் மாஸ்டர்ஸ் செஸ் தொடர் நடக்கிறது. இதன் மாஸ்டர்ஸ் பிரிவில் இந்தியாவின் அர்ஜுன் எரிகைசி, விதித் குஜ்ராத்தி, நிஹால் சரின், ஜெர்மனியின் வின்சென்ட் கீமர், நெதர்லாந்தின் அனிஷ் கிரி உள்ளிட்ட 10 பேர் பங்கேற்கின்றனர்.

நான்காவது சுற்றில் இந்தியாவின் அர்ஜுன், நிஹால் சரின் மோதினர். வெள்ளை நிற காய்களுடன் விளையாடிய நிஹால் சரின், 70வது நகர்த்தலில் வெற்றி பெற்றார். இத்தொடரில் அர்ஜுன், தனது முதல் தோல்வியை பெற்றார்.

மற்றொரு 4வது சுற்றில் இந்தியாவின் கார்த்திகேயன் முரளி, நெதர்லாந்தின் ஜோர்டன் வான் பாரஸ்ட் மோதினர். வெள்ளை நிற காய்களுடன் சாமர்த்தியமாக விளையாடிய கார்த்திகேயன், 46வது நகர்த்தலில் வெற்றி பெற்றார்.

இந்தியாவின் பிரனவ் (வெள்ளை), விதித் குஜ்ராத்தி (கருப்பு) மோதிய மற்றொரு போட்டி 86வது நகர்த்தலில் 'டிரா' ஆனது. வின்சென்ட் கீமர் (ஜெர்மனி, வெள்ளை), அனிஷ் கிரி (நெதர்லாந்து, கருப்பு) மோதிய 4வது சுற்றுப் போட்டி 28வது நகர்த்தலில் 'டிரா' ஆனது.

நான்கு சுற்றுகளின் முடிவில் வின்சென்ட் கீமர் (3.5 புள்ளி), அர்ஜுன் (2.5), அனிஷ் கிரி (2.0) முதல் மூன்று இடங்களில் உள்ளனர்.

வைஷாலி ஏமாற்றம்: சாலஞ்சர்ஸ் பிரிவு 4வது சுற்றில் இந்தியாவின் வைஷாலி, அபிமன்யு புரானிக் மோதினர். இதில் வெள்ளை நிற காய்களுடன் களமிறங்கிய அபிமன்யு, 43வது நகர்த்தலில் வென்றார். மற்றொரு போட்டியில் இந்தியாவின் இனியன் (வெள்ளை) 45வது நகர்த்தலில் சகவீரர் ஆர்யன் சோப்ராவை தோற்கடித்தார்.

மற்றொரு 4வது சுற்றில் இந்தியாவின் திப்தயன் கோஷ் (கருப்பு) 76வது நகர்த்தலில் சகவீரர் ஹர்ஷ்வர்தனை வீழ்த்தினார். இந்தியாவின் அதிபன் (வெள்ளை), பிரனேஷ் (கருப்பு) மோதிய போட்டி 36வது நகர்த்தலில் 'டிரா' ஆனது.

நான்கு சுற்றுகளின் முடிவில் அபிமன்யு புரானிக் (3.5 புள்ளி), பிரனேஷ் (3.0), திப்தியன் (3.0) முதல் மூன்று இடங்களில் உள்ளனர்.