நெதர்லாந்தில், டாடா ஸ்டீல் சர்வதேச செஸ் தொடரின் 88வது சீசன் நடக்கிறது. இதன் மாஸ்டர்ஸ் பிரிவில் இந்தியாவின் குகேஷ், அர்ஜுன் எரிகைசி, பிரக்ஞானந்தா, நெதர்லாந்தின் அனிஷ் கிரி, ஜெர்மனியின் வின்சன்ட் கீமர் உள்ளிட்ட 14 பேர் விளையாடுகின்றனர்.

நான்காவது சுற்றில் 'நடப்பு உலக சாம்பியன்' குகேஷ் (வெள்ளை), 'நடப்பு சாம்பியன்' பிரக்ஞானந்தா (கருப்பு) மோதினர். விறுவிறுப்பான இப்போட்டி 40வது நகர்த்தலில் 'டிரா' ஆனது.

அர்ஜுன் எரிகைசி (கருப்பு), நெதர்லாந்தின் அனிஷ் கிரி (வெள்ளை) மோதிய மற்றொரு போட்டி 80வது நகர்த்தலில் 'டிரா' ஆனது. மற்றொரு போட்டியில் இந்தியாவின் அரவிந்த் சிதம்பரம், அமெரிக்காவின் ஹான்ஸ் நீமன் மோதினர். வெள்ளை நிற காய்களுடன் களமிறங்கிய அரவிந்த், 55வது நகர்த்தலில் தோல்வியடைந்தார்.

நான்கு சுற்றுகளின் முடிவில் ஹான்ஸ் நீமன் (அமெரிக்கா), நாடிர்பெக் (உஸ்பெகிஸ்தான்) தலா 3 புள்ளிகளுடன் முதலிடத்தை பகிர்ந்து கொண்டுள்ளனர். அர்ஜுன் (இந்தியா), ஜவோகிர் சின்டாரோவ் (உஸ்பெகிஸ்தான்), ஜோர்டன் வான் பாரெஸ்ட் (நெதர்லாந்து) தலா 2.5 புள்ளிகளுடன் 3வது இடத்தை பகிர்ந்து கொண்டுள்ளனர்.