கஜகஸ்தானில், ஆசிய துப்பாக்கி சுடுதல் சாம்பியன்ஷிப் 16வது சீசன் நடக்கிறது. பெண்களுக்கான தனிநபர் 10 மீ., 'ஏர் ரைபிள்' பிரிவு தகுதிச் சுற்றில் இந்தியாவின் இளவேனில் (630.7 புள்ளி), மெஹுலி கோஷ் (630.3) முறையே 7, 8வது இடம் பிடித்து பைனலுக்கு முன்னேறினர். அடுத்து நடந்த பைனலில் அசத்திய தமிழகத்தின் இளவேனில், 253.6 புள்ளிகளுடன் முதலிடம் பிடித்து தங்கம் வென்றார். இது, ஆசிய சாம்பியன்ஷிப் அரங்கில் இளவேனில் கைப்பற்றிய 4வது தங்கம், 9வது பதக்கம். இதுவரை 4 தங்கம், 4 வெள்ளி, ஒரு வெண்கலம் வென்றுள்ளார். தவிர, இம்முறை சீனியர் பிரிவில் இந்தியாவுக்கு கிடைத்த 2வது தங்கம் இது. ஏற்கனவே இந்திய வீரர் அனந்த்ஜீத் சிங் நருகா ('ஸ்கீட்') தங்கம் வென்றிருந்தார்.

மற்றொரு இந்திய வீராங்கனை மெஹுலி கோஷ் (208.9) 4வது இடம் பிடித்தார்.

பெண்கள் அணிகளுக்கான 10 மீ., 'ஏர் ரைபிள்' பிரிவில் இளவேனில், மெஹுலி, அனன்யா அடங்கிய இந்திய அணி, 1891.3 புள்ளிகளுடன் 3வது இடம் பிடித்து வெண்கலம் கைப்பற்றியது.

ஜூனியர் பெண்களுக்கான 10 மீ., 'ஏர் ரைபிள்' பிரிவில் ஷம்பவி (633.7), ஹ்ருத்ய ஸ்ரீ (632.1), இஷா அனில் (630.4) அடங்கிய இந்திய அணி, 1896.2 புள்ளிகளுடன் முதலிடம் பிடித்து தங்கப்பதக்கத்தை தட்டிச் சென்றது.