ரூர்கேலா (ஒடிசா), ராஞ்சியில் (ஜார்க்கண்ட்) ஆண்களுக்கான ஹாக்கி இந்தியா லீக் 6வது சீசன் நடக்கிறது. மொத்தம் 8 அணிகள் பங்கேற்றன. 'டபுள் ரவுண்டு-ராபின்' முறையில் நடந்த லீக் சுற்று நடந்தது. இதன் முடிவில் முதல் நான்கு இடங்களை பிடித்த பெங்கால் (19 புள்ளி), சூர்மா (19), ஐதராபாத் (18), தமிழகம் (18) அணிகள் அரையிறுதிக்கு முன்னேறின. அடுத்த நான்கு இடங்களை கைப்பற்றிய உ.பி., (17 புள்ளி), கலிங்கா (12), கோனாசிகா (12), டில்லி (5) அணிகள் அரையிறுதி வாய்ப்பை இழந்து வெளியேறின.

ரூர்கேலாவில் நடக்கும் முதல் அரையிறுதியில் (ஜன. 31) பெங்கால், தமிழக அணிகள் மோதுகின்றன. லீக் சுற்றில் பெங்கால் அணியை வீழ்த்திய உற்சாகத்தில் தமிழக அணி களமிறங்குகிறது. லீக் போட்டியில் கோல் அடித்த ஜிப் ஜான்சென் (6 கோல்), நாதன் எப்ராம்ஸ் (3), அபரன் சுதேவ் (2), கார்த்தி செல்வம் (2), டாம் கிரெய்க் (1) மீண்டும் கைகொடுத்தால் சுலப வெற்றி பெற்று பைனலுக்கு முன்னேறலாம்.

பெங்கால் அணிக்கு ஜக்ராஜ் சிங் (9 கோல்), ருபிந்தர்பால் சிங் (5), சுக்ஜீத் சிங் (3), அபிஷேக் (3) மீண்டும் அசத்தினால் லீக் சுற்றில் தமிழகத்திடம் கண்ட தோல்விக்கு பதிலடி கொடுத்து பைனலுக்குள் நுழையலாம்.

மற்றொரு அரையிறுதியில் சூர்மா, ஐதராபாத் அணிகள் மோதுகின்றன.