ஓமனில், ஜூனியர் ஆசிய கோப்பை ஹாக்கி (21 வயதுக்குட்பட்ட) தொடரின் 10 வது சீசன் நடக்கிறது. நடப்பு சாம்பியன் இந்தியா, ஜப்பான், தென் கொரியா உட்பட 10 அணிகள் மோதுகின்றன. இவை இரு பிரிவுகளாக பிரிக்கப்பட்டு, லீக் முறையில் போட்டி நடக்கின்றன. ஒவ்வொரு பிரிவிலும் முதல் இரு இடம் பெறும் அணிகள் அரையிறுதிக்கு முன்னேறும்.

'ஏ' பிரிவில் இடம் பெற்ற இந்திய அணி முதல் போட்டியில் தாய்லாந்தை 11-0 என வென்றது. நேற்று தனது இரண்டாவது போட்டியில் இந்திய அணி, ஜப்பானை சந்தித்தது.

முதல் கோல்

போட்டி துவங்கிய 12வது நிமிடத்தில் இந்தியாவுக்கு 'பெனால்டி கார்னர்' வாய்ப்பு கிடைத்தது. இதில் தோக்சோம் கிங்சன் சிங் கோல் அடித்து அசத்தினார். 15வது நிமிடம் ஜப்பான் அணிக்கு நியோ சாட்டோ, 'பெனால்டி கார்னர்' வாய்ப்பில் கோல் அடித்தார். முதல் பாதியில் இரு அணிகளும் 1-1 என சமனில் இருந்தன.

இரண்டாவது பாதியில் கிடைத்த மற்றொரு 'பெனால்டி கார்னரில்' இந்திய துணைக் கேப்டன் ரோகித் (36) கோல் அடித்தார். அடுத்த இரண்டாவது நிமிடத்தில் ஜப்பானின் நியோ சாட்டோ, மற்றொரு கோல் அடிக்க, ஸ்கோர் மீண்டும் சமன் ஆனது.

அராய்ஜீத் அபாரம்

போட்டியின் 39 வது நிமிடத்தில் இந்திய வீரர் அராய்ஜீத் சிங், ஒரு பீல்டு கோல் அடித்தார். முடிவில் இந்திய அணி 3-2 என்ற கோல் கணக்கில் வெற்றி பெற்றது. இந்தியா 2 வெற்றியுடன் பட்டியலில் (6 புள்ளி) இரண்டாவது முதலிடத்துக்கு முன்னேறியது. இந்திய அணி தனது மூன்றாவது போட்டியில், நாளை சீன தைபேவை சந்திக்க உள்ளது.

பாக்., வெற்றி

'பி' பிரிவில் நடந்த மற்றொரு போட்டியில் பாகிஸ்தான், வங்கதேச அணிகள் மோதின. இதில் பாகிஸ்தான் அணி 6-0 என்ற கோல் கணக்கில் வெற்றி பெற்றது.