ஜெர்மனியில், உலக பல்கலை., விளையாட்டு 32வது சீசன் நடக்கிறது. இந்தியா சார்பில் 90 பல்கலை.,யில் இருந்து 300க்கும் மேற்பட்டோர் பங்கேற்கின்றனர்.

ஆண்கள் அணிகளுக்கான வில்வித்தை 'காம்பவுண்டு' பிரிவு காலிறுதியில் இந்திய அணி 236-229 என அமெரிக்காவை வீழ்த்தியது. அடுத்து நடந்த அரையிறுதியில் இந்தியா, சீனதைபே அணிகள் மோதின. குஷால் தலால், சாஹில் ராஜேஷ் ஜாதவ், ஹிருத்திக் சர்மா அடங்கிய இந்திய அணி 235-233 என்ற கணக்கில் வெற்றி பெற்று பைனலுக்குள் நுழைந்தது.

நாளை நடக்கவுள்ள ஆண்களுக்கான தனிநபர் பிரிவு அரையிறுதியில் குஷால் தலால், சாஹில் ராஜேஷ் ஜாதவ் மோதுகின்றனர். இதனையடுத்து 'காம்பவுண்டு' பிரிவில் இந்தியாவுக்கு 2 பதக்கம் உறுதியானது.

பெண்கள் அணிகளுக்கான 'காம்பவுண்டு' பிரிவு காலிறுதியில் பர்னெத் கவுர், அவ்னீத் கவுர், மதுரை அடங்கிய இந்திய அணி 232-226 என இத்தாலியை வீழ்த்தியது. அடுத்து நடந்த அரையிறுதியில் இந்திய அணி 230-233 என அமெரிக்காவிடம் தோல்வியடைந்தது. இனி, வெண்கலப் பதக்கத்துக்கான போட்டியில் பிரிட்டனை சந்திக்கவுள்ளது.

தடகளம்: ஆண்கள், பெண்களுக்கான 5000 மீ., ஓட்டத்தின் தகுதிச் சுற்றில் அசத்திய இந்தியாவின் கிரண் மாத்ரே (14 நிமிடம், 41.49 வினாடி), சீமா (15 நிமிடம், 30.70 வினாடி) பைனலுக்கு முன்னேறினர்.

* ஆண்களுக்கான ஈட்டி எறிதல் தகுதிச் சுற்றில், 71.60 மீ., எறிந்த இந்தியாவின் சாஹில் சில்வால், பைனலுக்கு தகுதி பெற்றார்.

* கலப்பு அணிகளுக்கான 4x400 மீ., தொடர் ஓட்டத்தின் தகுதிச் சுற்றில் அசத்திய ஜெரோமி சஞ்சய், ரூபால், விஷால், தேவ்யானிபா அடங்கிய இந்திய அணி (3 நிமிடம், 19.21 வினாடி) பைனலுக்குள் நுழைந்தது.