ஓமன் தலைநகர் மஸ்கட்டில், ஜூனியர் (21 வயது) ஆசிய கோப்பை ஹாக்கி 10வது சீசன் நடக்கிறது. 'நடப்பு சாம்பியன்' இந்தியா, பாகிஸ்தான், வங்கதேசம் உள்ளிட்ட 10 அணிகள், இரண்டு பிரிவுகளாக லீக் சுற்றில் மோதின. முடிவில் 'ஏ' பிரிவில் முதலிரண்டு இடம் பிடித்த இந்தியா (12 புள்ளி), ஜப்பான் (9), 'பி' பிரிவில் முதலிரண்டு இடத்தை கைப்பற்றிய பாகிஸ்தான் (12), மலேசியா (7) அணிகள் அரையிறுதிக்கு முன்னேறின.

இன்று நடக்கும் அரையிறுதியில் இந்திய அணி, மலேசியாவை எதிர்கொள்கிறது. லீக் சுற்றில் தாய்லாந்து (11-0), ஜப்பான் (3-2), சீனதைபே (16-0), தென் கொரியாவை (8-1) வீழ்த்திய உற்சாகத்தில் இந்தியா உள்ளது.

இதில் கோல் அடித்த இந்தியாவின் அர்ஷ்தீப் சிங் (7 கோல்), அராய்ஜீத் சிங் (6), சவுரப் ஆனந்த் (5), தில்ராஜ் சிங் (5), ரோசன் குஜூர் (4), குர்ஜோத் சிங் (3), ரோகித் (3) உள்ளிட்டோர் மீண்டும் கைகொடுத்தால் சுலப வெற்றி பெறலாம். தவிர, 7வது முறையாக பைனலுக்கு முன்னேறலாம்.

லீக் சுற்றில் சீனா, ஓமனை வீழ்த்திய மலேசிய அணி, வங்கதேசத்துக்கு எதிராக 'டிரா' செய்தது. கடைசி லீக் போட்டியில் பாகிஸ்தானிடம் தோல்வியடைந்த மலேசியா, 2வது இடம் பிடித்து அரையிறுதிக்குள் நுழைந்தது. இன்று வெற்றி பெற்றால், 3வது முறையாக பைனலில் விளையாடலாம்.

இன்று நடக்கும் மற்றொரு அரையிறுதியில் பாகிஸ்தான், ஜப்பான் அணிகள் மோதுகின்றன.