ADDED : மே 18, 2024 11:23 PM

வெய்ன்ஹெய்ம்: ஜெர்மனியில் நடந்த 100 மீ., தடை ஓட்டத்தில் இந்தியாவின் ஜோதி தங்கம் கைப்பற்றினார்.
ஜெர்மனியில் தேசிய தடகள போட்டி நடந்தது. பெண்களுக்கான 100 மீ., தடை ஓட்டத்தில் இந்தியாவின் ஜோதி யர்ராஜி களமிறங்கினார். சமீபத்தில் நெதர்லாந்தில் 'ஹாரி ஷல்ட்டிங்' விளையாட்டில் தங்கம் வென்ற ஜோதி, நேற்று மீண்டும் அசத்தினார்.
பெண்களுக்கான 100 மீ., தடை ஓட்டத்தில் தகுதிச்சுற்று 1ல் களமிறங்கிய 13.36 வினாடி நேரத்தில் வந்து முதலிடம் பிடித்து, பைனலுக்கு முன்னேறினார். அடுத்து நடந்த பைனலிலும் சிறப்பாக செயல்பட்ட ஜோதி, 13.06 வினாடி நேரத்தில் ஓடி, முதலிடம் பெற்று, தங்கப்பதக்கம் கைப்பற்றினார்.
ஜெர்மனியின் கேத்தரினா (13.61 வினாடி), லிசா (13.84 வினாடி) அடுத்த இரு இடம் பிடித்து வெள்ளி, வெண்கலப் பதக்கம் வசப்படுத்தினார். பெண்களுக்கான 200 மீ., ஓட்டத்தில் ஜோதி (23.83 வினாடி) வெண்கலப் பதக்கம் வென்றார்.
ஆண்களுக்கான 110 மீ., தடை ஓட்டத்தில் இந்தியாவின் தேஜா ஷிர்சே பங்கேற்றார். தகுதிச்சுற்றில் தேஜா, 13.83 வினாடி நேரத்தில் வந்து இரண்டாவது இடம் பிடித்தார். அடுத்து நடந்த பைனலில் தேஜா, 13.60 வினாடி நேரத்தில் வந்த போதும் இரண்டாவது இடம் தான் கிடைத்தது.
ஆண்களுக்கான 800 மீ., ஓட்டத்தில் ஆசிய விளையாட்டில் வெள்ளி வென்ற இந்திய வீரர் முகமது அப்சல், 1 நிமிடம், 47.05 வினாடி நேரத்தில் வந்து தங்கப்பதக்கம் கைப்பற்றினார். ஆண்களுக்கான 200 மீ., ஓட்டத்தில் இந்தியாவின் அனிமேஷ் (20.96 வினாடி), வெள்ளிப்பதக்கம் வசப்படுத்தினார்.
