நெதர்லாந்தில், டாடா ஸ்டீல் சர்வதேச செஸ் தொடரின் 88வது சீசன் நடக்கிறது. இதன் மாஸ்டர்ஸ் பிரிவில் இந்தியாவின் குகேஷ், அர்ஜுன் எரிகைசி, பிரக்ஞானந்தா, நெதர்லாந்தின் அனிஷ் கிரி, ஜெர்மனியின் வின்சன்ட் கீமர் உள்ளிட்ட 14 பேர் விளையாடுகின்றனர்.

முதல் சுற்றில் இந்தியாவின் பிரக்ஞானந்தா, அர்ஜுன் எரிகைசி மோதினர். இதில் வெள்ளை நிற காய்களுடன் விளையாடிய அர்ஜுன், 32வது நகர்த்தலில் வெற்றி பெற்றார். 'நடப்பு உலக சாம்பியன்' குகேஷ் (கருப்பு), உஸ்பெகிஸ்தானின் ஜாவோகிர் சின்டரோவ் (வெள்ளி) மோதிய மற்றொரு முதல் சுற்று போட்டி 78வது நகர்த்தலில் 'டிரா' ஆனது.

மற்றொரு போட்டியில் ஜெர்மனியின் வின்சன்ட் கீமர் (வெள்ளை), 23வது நகர்த்தலில் நெதர்லாந்தின் அனிஷ் கிரியை (கருப்பு) வீழ்த்தினார். இந்தியாவின் அரவிந்த் சிதம்பரம் (வெள்ளை), ஜெர்மனியின் மத்தியாஸ் புளூபாம் (கருப்பு) மோதிய போட்டி 41வது நகர்த்தலில் 'டிரா' ஆனது.

முதல் சுற்றின் முடிவில் வின்சன்ட் கீமர் (ஜெர்மனி), அர்ஜுன் (இந்தியா), ஹான்ஸ் நீமன் (அமெரிக்கா) தலா 1 புள்ளியுடன் முதலிடத்தை பகிர்ந்து கொண்டுள்ளனர்.