சர்வதேச செஸ் கூட்டமைப்பு ('பிடே') சார்பில் பெண்களுக்கான கிராண்ட் பிரிக்ஸ் தொடர் நடக்கிறது. இதற்கான போட்டிகள் 6 கட்டமாக நடத்தப்படுகிறது.

மொனாக்கோவில் நடந்த 3ம் கட்டப் போட்டியில் இந்தியாவின் கொனேரு ஹம்பி, ஹரிகா உட்பட மொத்தம் 10 பேர் பங்கேற்றனர். இதன் 9வது, கடைசி சுற்றில் இந்தியாவின் ஹம்பி, கஜகஸ்தானின் பிபிசாரா அசாபயேவா மோதினர். இதில் வெள்ளை நிற காய்களுடன் விளையாடிய ஹம்பி, 55வது நகர்த்தலின் போது வெற்றி பெற்றார்.

மற்றொரு போட்டியில் இந்தியாவின் ஹரிகா, சீனாவின் ஜோங்கி டான் மோதினர். இதில் ஹரிகா, கறுப்பு நிற காய்களுடன் களமிறங்கினார். விறுவிறுப்பான இப்போட்டி 65வது நகர்த்தலில் 'டிரா' ஆனது.

ஒன்பது சுற்றுகளின் முடிவில் ரஷ்யாவின் அலெக்சாண்ட்ரா கோரியாச்கினா, ஹம்பி, மங்கோலியாவின் பட்குயாக் முன்குந்துால் தலா 5.5 புள்ளிகளுடன் முதலிடத்தை பகிர்ந்து கொண்டிருந்தனர். பின் 'டை பிரேக்கரில்' கோரியாச்கினா முதலிடம் பிடித்தார். அடுத்த இரு இடங்களை ஹம்பி, பட்குயாக் கைப்பற்றினர். மற்றொரு இந்திய வீராங்கனை ஹரிகா (4.0 புள்ளி) 7வது இடத்தை பகிர்ந்து கொண்டார்.