சென்னையில், அல்டிமேட் டேபிள் டென்னிஸ் 5வது சீசன் நடக்கிறது. இதன் லீக் போட்டியில் மும்பை, டில்லி அணிகள் மோதின. ஆண்கள் ஒற்றையர் முதல் போட்டியில் டில்லியின் சத்யன் ஞானசேகரன், மும்பையின் குவாட்ரி அருணா (நைஜீரியா) மோதினர். அபாரமாக ஆடிய சத்யன் 2-1 (4-11, 11-9, 11-9) என்ற கணக்கில் வெற்றி பெற்றார். இது, நைஜீரிய வீரருக்கு எதிராக சத்யன் பெற்ற முதல் வெற்றியானது.

பெண்கள் ஒற்றையர் முதல் போட்டியில் மும்பையின் சுதிர்தா முகர்ஜி 3-0 (11-6, 11-7, 11-4) என டில்லியின் தியாவை வீழ்த்தினார். கலப்பு இரட்டையர் பிரிவு போட்டியில் மும்பையின் மானவ் தாக்கர், மரியா ஜியாவோ ஜோடி 2-1 (11-8, 11-9, 8-11) என டில்லியின் சத்யன், ஓரவன் ஜோடியை வீழ்த்தியது.

ஆண்கள் ஒற்றையர் 2வது போட்டியில் மானவ் தாக்கர் 2-1 (11-5, 11-4, 7-11) என டில்லியின் லெவென்கோவை தோற்கடித்தார். பெண்கள் ஒற்றையர் 2வது போட்டியில் மரியா ஜியாவோ 1-2 (11-10, 9-11, 5-11) என ஓரவனிடம் தோல்வியடைந்தார். முடிவில் மும்பை அணி 9-6 என்ற கணக்கில் வெற்றி பெற்றது.

ஆமதாபாத் அபாரம்: மற்றொரு லீக் போட்டியில் ஆமதாபாத், 'நடப்பு சாம்பியன்' கோவா அணிகள் மோதின. இதில் ஆமதாபாத் அணி 10-5 என்ற கணக்கில் வெற்றி பெற்றது. கோவா சார்பில் ஹர்மீத் தேசாய், யாஷஸ்வினி தோல்வியடைந்தனர். ஆமதாபாத் சார்பில் மானுஷ் ஷா, ரீத் ரிஷ்யா வெற்றி பெற்றனர்.