இந்தியாவின் 38வது தேசிய விளையாட்டு உத்தரகாண்ட்டில் நடக்கிறது. ஆண்கள் அணிகளுக்கான டென்னிஸ் பைனலில் தமிழகம், கர்நாடகா மோதின. முதல் போட்டியில் தமிழகத்தின் அபினவ் சண்முகம், 3-6, 7-6, 6-4 என ரிஷி ரெட்டியை வீழ்த்தினார். இரண்டாவது போட்டியில் தமிழகத்தின் மணிஷ் சுரேஷ் குமார், பிரஜ்வல் தேவை சந்தித்தார். இதில் மணிஷ் 5-7, 6-4, 6-4 என வென்றார். முடிவில் 2-0 என வெற்றி பெற்று, தமிழக அணி தங்கப்பதக்கம் கைப்பற்றியது.

லவ்லினா கலக்கல்

பெண்களுக்கான குத்துச்சண்டை 75 கிலோ பிரிவு பைனலில் அசாமின் லவ்லினா, சண்டிகரின் பிரான்ஷு மோதினர். டோக்கியோ ஒலிம்பிக்கில் வெண்கலம் வென்ற லவ்லினா, 5-0 என எளிதாக வெற்றி பெற்று தங்கம் கைப்பற்றினார்.

60 கிலோ பிரிவு பைனலில் காமன்வெல்த் போட்டியில் வெண்கலம் கைப்பற்றிய, சர்வீசஸ் வீராங்கனை ஜாஸ்மின், 5-0 என, உலக சாம்பியன்ஷிப்பில் வெண்கலம் வென்ற மணிஷாவை (ஹரியானா) சாய்த்து தங்கம் வசப்படுத்தினார்.

ஆண்களுக்கான வெல்டர்வெயிட் (63.5 கிலோ) பிரிவு பைனலில் ஆறுமுறை ஆசிய சாம்பியன் ஆன அசாமின் ஷிவா தபா, சர்வீசஸ் அணியின் வன்ஷாஜ் மோதினர். இதில் ஷிவா தபா 3-4 என போராடி தோற்க, வெள்ளிப்பதக்கம் கிடைத்தது. வன்ஷாஜ் தங்கம் வென்றார்.

ஆண்களுக்கான கால்பந்து பைனலில் கேரளா அணி 1-0 என உத்தரகாண்ட்டை வீழ்த்தி தங்கம் கைப்பற்றியது. டில்லிக்கு வெண்கலம் கிடைத்தது. பெண்களுக்கான கால்பந்தில் ஹரியானா தங்கம் வென்றது. ஒடிசா (வெள்ளி), மேற்கு வங்கம் (வெண்கலம்) அடுத்த இரு இடம் பிடித்தன.