நார்வேயில் சர்வதேச செஸ் தொடர் நடக்கிறது. இதன் ஓபன் பிரிவில், ஐந்து முறை உலக சாம்பியன் கார்ல்சன் (நார்வே), இந்தியாவின் பிரக்ஞானந்தா, பிரான்சின் அலிரேசா உட்பட 6 பேர் பங்கேற்கின்றனர்.

ஏழாவது சுற்றில் இந்தியாவின் பிரக்ஞானந்தா, நடப்பு உலக சாம்பியன் டிங் லிரென் (சீனா) மோதினர். 'கிளாசிக்கல்' முறையிலான இப்போட்டியில் வெள்ளை நிற காய்களுடன் களமிறங்கினார். 29 வது நகர்த்தலில் செய்த தவறு காரணமாக, பின்தங்கினார் பிரக்ஞானந்தா. பின் சுதாரித்துக் கொண்ட இவர், அடுத்த நகர்த்தலில் (39வது) போட்டியை 'டிரா' செய்தார்.

வெற்றியாளரை முடிவு செய்ய 'ஆர்மகெடான் டை-பிரேக்கர்' முறை கடைபிடிக்கப்பட்டது. இதில் கட்டாயம் வென்றாக வேண்டிய நிலையில் வெள்ளை நிற காய்களுடன் களமிறங்கிய பிரக்ஞானந்தா, 23வது நகர்த்தலில் வெற்றி பெற்றார்.

இத்தொடரில் ஏற்கனவே உலகின் 'நம்பர்-1' கார்ல்சன், 'நம்பர்-2' காருணாவை (அமெரிக்கா) வென்ற பிரக்ஞானந்தா, 7 சுற்று முடிவில் 11.0 புள்ளியுடன் மூன்றாவது இடத்தில் நீடிக்கிறார்.

மற்றொரு போட்டியில் கார்ல்சன், அமெரிக்காவின் நகமுராவிடம் தோல்வியடைந்தார். இருப்பினும் கார்ல்சன் (13.0), நகமுரா (12.5) முதல் இரு இடத்தில் உள்ளனர்.

ஹம்பி வெற்றி

பெண்களுக்கான ஏழாவது சுற்றில் இந்திய வீராங்கனைகள் வைஷாலி, ஹம்பி மோதினர். கருப்பு நிற காய்களுடன் விளையாடிய வைஷாலி, 36 வது நகர்த்தலில் தோல்வியடைந்தார். 7 சுற்று முடிவில் வைஷாலி (10.0) மூன்றாவது இடத்தில் தொடர்கிறார். உக்ரைனின் அனா முசிசுக் (12.0) முதலிடத்திற்கு முன்னேறினார். ஜூ வென்ஜுன் (11.5) இரண்டாவது இடத்துக்கு தள்ளப்பட்டார்.