இந்தியாவில், புரோ கபடி லீக் 11வது சீசன் நடக்கிறது. புனேயில் நடந்த லீக் போட்டியில் ஹரியானா, தெலுங்கு டைட்டன்ஸ் அணிகள் மோதின. தெலுங்கு டைட்டன்ஸ் வீரர்களை இரண்டு முறை 'ஆல்-அவுட்' செய்த ஹரியானா அணி, முதல் பாதி முடிவில் 28-9 என முன்னிலையில் இருந்தது.

இரண்டாவது பாதியிலும் அசத்திய ஹரியானா அணி 18 புள்ளி பெற்றது. தெலுங்கு டைட்டன்ஸ் அணிக்கு 16 புள்ளி மட்டும் கிடைத்தது. ஆட்டநேர முடிவில் ஹரியானா அணி 46-25 என்ற கணக்கில் வெற்றி பெற்றது. ஹரியானா அணிக்கு ஷிவம் (12 புள்ளி), வினய் (7) கைகொடுத்தனர். தெலுங்கு டைட்டன்ஸ் சார்பில் ஆஷிஸ் நார்வல் 13, கேப்டன் விஜய் மாலிக் 5 புள்ளி பெற்றனர்.

இதுவரை விளையாடிய 18 போட்டியில், 14 வெற்றி, 4 தோல்வி என 72 புள்ளிகளுடன் ஹரியானா அணி முதலிடத்தில் நீடிக்கிறது. தெலுங்கு டைட்டன்ஸ் அணி 54 புள்ளிகளுடன் (10 வெற்றி, 8 தோல்வி) 5வது இடத்தில் உள்ளது.