மும்பையில், சி.சி.ஐ., ஸ்னுாக்கர் கிளாசிக் தொடர் நடக்கிறது. இதன் காலிறுதியில் பெட்ரோலிய விளையாட்டு மேம்பாட்டு வாரியம் (பி.எஸ்.பி.பி.,) அணியின் பங்கஜ் அத்வானி, ரயில்வேஸ் அணியின் மல்கீத் சிங் மோதினர். அபாரமாக ஆடிய அத்வானி 5-1 என்ற கணக்கில் வெற்றி பெற்று அரையிறுதிக்கு முன்னேறினார்.

மற்றொரு காலிறுதியில் பி.எஸ்.பி.பி., அணியின் இஷ்பிரீத் சிங் சதா, ரயில்வேஸ் அணியின் திலிப் குமார் மோதினர். இதில் அசத்திய இஷ்பிரீத் 5-0 என்ற கணக்கில் வெற்றி பெற்று அரையிறுதிக்குள் நுழைந்தார். குஜராத்தின் கீத் சேதி (1988), மும்பையின் ஆதித்ய மேத்தாவுக்கு (2013) பின், அதிகபட்சமாக 147 'பிரேக்' எடுத்த 3வது இந்திய வீரரானார்.

மற்றொரு காலிறுதியில் ரயில்வேஸ் அணியின் பைசல் கான் 5-0 என பி.எஸ்.பி.பி., அணியின் பிரிஜேஷ் தமானியை வென்றார். கமல் சாவ்லா 5-1 என ஹசன் பதாமியை தோற்கடித்து அரையிறுதிக்கு முன்னேறினார்.