பெங்களூருவில், மாற்றுத்திறனாளிகளுக்கான இந்திய ஓபன் பாரா தடகளத்தின் 7வது சீசன் நடக்கிறது. ஆண்களுக்கான ஈட்டி எறிதல், 'எப் 12-எப்64' பிரிவு பைனலில் அதிகபட்சமாக 72.25 மீ., எறிந்த ஹரியானாவின் சுமித் அன்டில் தங்கம் வென்றார். அடுத்த இரு இடங்களை ஹரியானாவின் மஞ்ஜீத் (54.56 மீ.,), சர்வீசஸ் அணியின் பிரதீப் குமார் (45.17 மீ.,) கைப்பற்றினர்.

ஆண்களுக்கான ஈட்டி எறிதல் 'எப்40-எப்41' பிரிவு பைனலில் ஹரியானாவின் நவ்தீப் சிங் (42.63 மீ.,), பிரின்ஸ் (31.90 மீ.,) முறையே தங்கம், வெள்ளி வென்றனர். வெண்கலப் பதக்கத்தை டில்லியின் ரிதேந்தர் (30.85 மீ.,) தட்டிச் சென்றார்.

ஆண்களுக்கான ஈட்டி எறிதல், 'எப்46' பிரிவு பைனலில் அசத்திய ராஜஸ்தானின் சுந்தர் சிங் குஜ்ஜார் (64.53 மீ.,) தங்கப்பதக்கத்தை கைப்பற்றினார். ஹரியானாவின் ரிங்கு ஹூடா (63.98 மீ.,), உ.பி.,யின் அஜீத் சிங் (63.25 மீ.,) முறையே வெள்ளி, வெண்கலம் வென்றனர்.

பிரீத்தி 'தங்கம்': பெண்களுக்கான 100 மீ., ஓட்டத்தின் 'டி35, டி37, டி42' பிரிவு பைனலில் உ.பி.,யின் பிரீத்தி பால் (15 வினாடி) முதலிடம் பிடித்து தங்கத்தை தட்டிச் சென்றார். அடுத்த இரு இடங்களை குஜராத்தின் பினா (17.20 வினாடி), ஹரியானாவின் அவானி (20.40 வினாடி) கைப்பற்றினர்.

பெண்களுக்கான 100 மீ., ஓட்டத்தின் 'டி12, டி13' பிரிவு பைனலில் உ.பி.,யின் சிம்ரன் (12.30 வினாடி) தங்கம் வென்றார். ஒடிசாவின் ஜானகி ஓரம் (14.20 வினாடி), கோவாவின் சாக் ஷி (14.90 வினாடி) முறையே வெள்ளி, வெண்கலத்தை கைப்பற்றினர்.

பெண்களுக்கான 400 மீ., ஓட்டத்தில் (டி11, டி12, டி13, டி20) தெலுங்கானாவின் தீப்தி ஜீவன்ஜி (56.70 வினாடி) தங்கம் வென்றார்.

தமிழக வீரர் அசத்தல்

ஆண்களுக்கான வட்டு எறிதல் 'எப்55, எப்56' பிரிவு பைனலில் தமிழகத்தின் முத்துராஜா தங்கம் வென்றார். ஹரியானாவின் யோகேஷ் கதுனியா, ராமன் முறையே வெள்ளி, வெண்கலம் கைப்பற்றினர்.