சவுதி அரேபியாவில் சர்வதேச 'சவுதி ஸ்மாஷ்' டேபிள் டென்னிஸ் தொடர் நடக்கிறது. இதன் ஆண்கள் ஒற்றையர் பிரிவு முதல் சுற்றில் இந்தியாவின் அஜந்தா சரத் கமல், நைஜீரியாவின் குவாட்ரி அருணா மோதினர். முதலிரண்டு செட்களை 11-8, 13-11 எனக் கைப்பற்றிய சரத் கமல், அடுத்த இரு செட்களை 8-11, 5-11 என இழந்தார். வெற்றியாளரை நிர்ணயிக்கும் கடைசி செட்டில் மீண்டும் ஏமாற்றிய இவர் 11-13 என போராடி கோட்டைவிட்டார். முடிவில் சரத் கமல் 2-3 (11-8, 13-11, 8-11, 5-11, 11-13) என்ற கணக்கில் தோல்வியடைந்தார்.

கலப்பு இரட்டையர் பிரிவு முதல் சுற்றில் இந்தியாவின் ஹர்மீத் தேசாய், யாஷஸ்வினி கோர்படே ஜோடி 3-2 (11-7, 9-11, 11-4, 4-11, 11-5) என சிலியின் நிக்கோலஸ் பர்கோஸ், பவுலினா வேகா ஜோடியை வீழ்த்தியது.

பெண்கள் ஒற்றையர் பிரிவு முதல் சுற்று போட்டியில் இந்தியாவின் ஸ்ரீஜா அகுலா 1-3 (7-11, 11-13, 11-9, 12-14) என போர்ச்சுகலின் ஜீனி ஷாவோவிடம் தோல்வியடைந்தார்.