அல்பேனியாவில், 23 வயதுக்குட்பட்டோருக்கான உலக மல்யுத்த சாம்பியன்ஷிப் தொடர் நடந்தது. ஆண்களுக்கான 'பிரீஸ்டைல்' 61 கிலோ வெண்கலப் பதக்கத்துக்கான போட்டியில் இந்தியாவின் அபிஷேக் தாகா, உக்ரைனின் மைகிதா அப்ரமோவ் மோதினர். அபாரமாக ஆடிய அபிஷேக் 3-1 என்ற கணக்கில் வெற்றி பெற்று வெண்கலப் பதக்கத்தை தட்டிச் சென்றார். இது, உலக சாம்பியன்ஷிப் அரங்கில் அபிஷேக் கைப்பற்றிய 2வது பதக்கம். இதற்கு முன், 2022ல் பல்கேரியாவில் நடந்த 20 வயதுக்குட்பட்டோருக்கான உலக சாம்பியன்ஷிப் தொடரின் 57 கிலோ பிரிவில் அபிஷேக் வெண்கலம் வென்றிருந்தார்.

ஆண்களுக்கான 'பிரீஸ்டைல்' 57 கிலோ பிரிவு அரையிறுதியில் இந்தியாவின் சிராக் 8-0 என, கஜகஸ்தானின் ஆலன் ஓரல்பெக்கை வீழ்த்தி பைனலுக்குள் நுழைந்தார்.

மற்ற எடைப்பிரிவில் இந்தியாவின் அனிருத் குமார் (125 கிலோ), தீபக் நெஹ்ரா (86 கிலோ) ஏமாற்றினர். இத்தொடரில் இந்தியாவுக்கு இதுவரை ஒரு வெள்ளி, 5 வெண்கலம் என, மொத்தம் 6 பதக்கம் கிடைத்துள்ளன.