கடைசி நேரத்தில் பாராலிம்பிக் சாம்பியன்கள் சுமித் அன்டில் (ஈட்டி எறிதல்), பிரவீன் குமார் (உயரம் தாண்டுதல்) உள்ளிட்ட முன்னணி நட்சத்திரங்கள் விலகினர்.

நேற்று கடைசி நாள் போட்டி நடந்தது. ஆண்களுக்கான 800 மீ., வீல் சேர் ரேசிங் ('டி 54) பிரிவு பைனல் நடந்தது. இந்தியாவின் ரமேஷ் சண்முகம், ஒரு நிமிடம், 50.85 வினாடி நேரத்தில் வந்து முதலிடம் பிடித்தார். தமிழகத்தை சேர்ந்த இவர், தங்கம் வென்றார். மணிகண்டன் (2 நிமிடம், 16.15 வினாடி, தமிழகம்) இரண்டாவது, பிலிப்பைன்சின் ஜெரால்டு (2 நிமிடம், 16.65 வினாடி) 3வது இடம் பெற்றனர்.

வனேசா அபாரம்

பாராலிம்பிக்கில் 3 முறை தங்கம் வென்றவர் ஆஸ்திரேலியாவின் வனேசா. நேற்று நீளம் தாண்டுதலில் அசத்திய இவர், 4.96 மீ., துாரம் தாண்டி, தங்கம் வென்றார். இந்தியாவின் பவானி முனியாண்டி (3.51 மீ.,) வெண்கலம் கைப்பற்றினார்.

200 மீ., ஓட்டத்தில் இந்தியாவின் வினய் (29.58 வினாடி), அபிஷேக் (31.55) இரண்டு, மூன்றாவது இடம் பெற்று, வெள்ளி, வெண்கலம் கைப்பற்றினர்.

200 மீ., 'டி-64' பிரிவில் இந்திய வீரர்கள் பிரனவ் (24.75), நரேஷ் (25.16) வெள்ளி, வெண்கலம் வென்றனர். 5000 மீ., வீல் சேர் ரேசிங் போட்டியில் இந்தியாவின் அனில் குமார் (13 நிமிடம், 42.33 வினாடி) மட்டும் பங்கேற்று, தங்கம் வென்றார்.

பாரிஸ் பாராலிம்பிக்கில் 2 வெண்கலம் வென்று வரலாறு படைத்த இந்தியாவின் பிரீத்தி பால் (31.50 வினாடி), 200 மீ., டி 38 பிரிவு ஓட்டத்தில், வெண்கலப் பதக்கம் கைப்பற்றினார். ஆஸ்திரேலியாவின் ரியான்னன் (26.76), ரஷ்யாவின் மார்கரிட்டா (27.00) தங்கம், வெள்ளி வசப்படுத்தினர்.

ஆண்களுக்கான 5000 மீ., டி 12 பிரிவு ஓட்டத்தில் இந்தியாவின் ஷரத் (16 நிமிடம், 19.13 வினாடி), சவுரப் (16:58.08), அன்குர் தர்மா (18:58.08) தங்கம், வெள்ளி, வெண்கலம் வென்றனர். பெண்களுக்கான 200 மீ., (டி 47) ஓட்டத்தில் இந்தியாவின் அஞ்சனாபென் (29.64 வினாடி) வெண்கலம் வென்றார்.

134 பதக்கம்

இந்தியா 45 தங்கம், 40 வெள்ளி, 49 வெண்கலம் என மொத்தம் 134 பதக்கம் கைப்பற்றி, பட்டியலில் முதலிடம் பிடித்தது.