ஹங்கேரியில், 'ரேங்கிங் சீரிஸ்' சர்வதேச மல்யுத்த தொடர் நடந்தது. ஆண்களுக்கான 'கிரிகோ-ரோமன்' 60 கிலோ பிரிவு பைனலில் இந்தியாவின் சுமித், 'நடப்பு உலக சாம்பியன்' அஜர்பெய்ஜானின் நிஹாத் மம்மட்லி மோதினர். ஆசிய சாம்பியன் (23 வயது) பட்டம் வென்ற சுமித், 1-5 என்ற கணக்கில் தோல்வியடைந்து வெள்ளி வென்றார்.

'கிரிகோ-ரோமன்' 55 கிலோ பிரிவு வெண்கலப் பதக்கத்துக்கான போட்டியில் இந்தியாவின் அனில் மோர், உஸ்பெகிஸ்தானின் இக்தியோர் போதிரோவ் மோதினர். இதில் அனில் 7-4 என வெற்றி பெற்று வெண்கலத்தை தட்டிச் சென்றார்.

இத்தொடரில் இந்தியாவுக்கு 3 தங்கம், 3 வெள்ளி, 4 வெண்கலம் என, மொத்தம் 10 பதக்கம் கிடைத்தது. பெண்கள் பிரிவில் இந்திய அணி 130 புள்ளிகளுடன் ஒட்டுமொத்த சாம்பியன் பட்டத்தை கைப்பற்றியது.