அமெரிக்காவின் நியூயார்க் நகரில் யு.எஸ்., ஓபன் கிராண்ட்ஸ்லாம் டென்னிஸ் தொடர் நடக்கிறது. இதன் பெண்கள் ஒற்றையர் பிரிவு 3வது சுற்றில் உலகின் 'நம்பர்-1' போலந்தின் இகா ஸ்வியாடெக், ரஷ்யாவின் அனஸ்டாசியா பவுலிசென்கோவா மோதினர். ஸ்வியாடெக் 6-4, 6-2 என்ற நேர் செட் கணக்கில் வெற்றி பெற்று 4வது சுற்றுக்குள் நுழைந்தார்.

மற்றொரு 3வது சுற்றில் அமெரிக்காவின் ஜெசிகா பெகுலா 6-3, 6-3 என ஸ்பெயினின் ஜெசிகா மனிரோவை வீழ்த்தினார். மற்ற 3வது சுற்றுப் போட்டிகளில் இத்தாலியின் ஜாஸ்மின் பவுலினி, டென்மார்க்கின் கரோலின் வோஸ்னியாக்கி, செக்குடியரசின் கரோலினா முச்சோவா, ரஷ்யாவின் லியுட்மிலா சாம்சோனோவா, பிரேசிலின் பீட்ரிஸ் ஹட்டாத் மியா வெற்றி பெற்றனர்.

சின்னர் வெற்றி: ஆண்கள் ஒற்றையர் பிரிவு 3வது சுற்றில் உலகின் 'நம்பர்-1' இத்தாலியின் ஜானிக் சின்னர், ஆஸ்திரேலியாவின் கிறிஸ்டோபர் ஓ'கானல் மோதினர். இதில் அசத்திய சின்னர் 6-1, 6-4, 6-2 என்ற நேர் செட் கணக்கில் வெற்றி பெற்று 4வது சுற்றுக்கு முன்னேறினார்.

மற்றொரு போட்டியில் ஆஸ்திரேலியாவின் அலெக்ஸ் டி மினார் 6-3, 6-7, 6-0, 6-0 என பிரிட்டனின் டேனியல் ஈவன்சை தோற்கடித்தார். மற்ற 3வது சுற்றுப் போட்டிகளில் ரஷ்யாவின் டேனியல் மெத்வெடேவ், அமெரிக்காவின் டாமி பால், ஆஸ்திரேலியாவின் ஜோர்டான் தாம்சன் உள்ளிட்டோர் வெற்றி பெற்றனர்.