அமெரிக்காவின் நியூயார்க் நகரில் யு.எஸ்., ஓபன் கிராண்ட்ஸ்லாம் டென்னிஸ் தொடர் நடக்கிறது. இதன் ஆண்கள் ஒற்றையர் பிரிவு 2வது சுற்றில் ஸ்பெயினின் கார்லஸ் அல்காரஸ், நெதர்லாந்தின் போடிக் வான் டி ஜாண்ட்ஸ்கல்ப் மோதினர். இரண்டு மணி நேரம், 19 நிமிடம் நீடித்த போட்டியில் ஏமாற்றிய அல்காரஸ் 1-6, 5-7, 4-6 என்ற நேர் செட் கணக்கில் தோல்வியடைந்தார். இதன்மூலம் கிராண்ட்ஸ்லாம் அரங்கில் தொடர்ச்சியாக 15 போட்டியில் வெற்றி பெற்ற அல்காரசின் வெற்றிநடை முடிவுக்கு வந்தது.

மற்றொரு 2வது சுற்றுப் போட்டியில் உலகின் 'நம்பர்-1' இத்தாலியின் ஜானிக் சின்னர் 6-4, 6-0, 6-2 என அமெரிக்காவின் அலெக்ஸ் மைக்கேல்சனை தோற்கடித்தார். மற்ற 2வது சுற்றுப் போட்டிகளில் ரஷ்யாவின் டேனியல் மெத்வெடேவ், அமெரிக்காவின் டாமி பால், பிரிட்டனின் டேனியல் ஈவன்ஸ், பெல்ஜியத்தின் டேவிட் கோபின், ஆஸ்திரேலியாவின் அலெக்ஸ் டி மினார் வெற்றி பெற்றனர்.

ஒசாகா ஏமாற்றம்: பெண்கள் ஒற்றையர் பிரிவு 2வது சுற்றில் ஜப்பானின் நவோமி ஒசாகா, செக்குடியரசின் கரோலினா முச்சோவா மோதினர். இதில் ஏமாற்றிய ஒசாகா 3-6, 6-7 என்ற கணக்கில் தோல்வியடைந்து வெளியேறினார்.

மற்றொரு 2வது சுற்றில் உலகின் 'நம்பர்-1' போலந்தின் இகா ஸ்வியாடெக் 6-0, 6-1 என ஜப்பானின் எனா ஷிபாஹராவை தோற்கடித்தார். அமெரிக்காவின் ஜெசிகா பெகுலா 7-6, 6-3 என சகவீராங்கனை சோபியா கெனினை வீழ்த்தி 3வது சுற்றுக்கு முன்னேறினார். மற்ற 2வது சுற்று போட்டிகளில் டென்மார்க்கின் கரோலின் வோஸ்னியாக்கி, கஜகஸ்தானின் யுலியா புடின்ட்சேவா, ரஷ்யாவின் அனஸ்டாசியா பவுலிசென்கோவா, இத்தாலியின் சாரா எர்ரானி வெற்றி பெற்றனர். செக்குடியரசின் கரோலினா பிலிஸ்கோவா, கஜகஸ்தானின் எலினா ரிபாகினா அதிர்ச்சி தோல்வியடைந்தனர்.

போபண்ணா ஜோடி அபாரம்ஆண்கள் இரட்டையர் பிரிவு முதல் சுற்றில் இந்தியாவின் ரோகன் போபண்ணா, ஆஸ்திரேலியாவின் மாத்யூ எப்டென் ஜோடி 6-3, 7-5 என நெதர்லாந்தின் சாண்டர் அரேன்ட்ஸ், ராபின் ஹாஸ் ஜோடியை வீழ்த்தியது.