சென்னையில், பெண்களுக்கான 'டபிள்யு.டி.ஏ., 250' அந்தஸ்து பெற்ற சென்னை ஓபன் டென்னிஸ் தொடர் நடக்கிறது. இதன் ஒற்றையர் பிரிவு காலிறுதியில் ஆஸ்திரேலியாவின் அரினா ரோடியோனோவா, சீனதைபேயின் ஜோனா கார்லேண்டு மோதினர். முதல் செட்டை 6-2 என கைப்பற்றிய ஜோனா, 'டை பிரேக்கர்' வரை சென்ற 2வது செட்டை 7-6 என வசப்படுத்தினார்.

ஒரு மணி நேரம், 56 நிமிடம் நடந்த போட்டியில் ஜோனா, 6-2, 7-6 என்ற நேர் செட் கணக்கில் வெற்றி பெற்று, அரையிறுதிக்கு முன்னேறினார்.

மற்றொரு காலிறுதியில் இந்தோனேஷியாவின் ஜானிஸ் டிஜென், சுலோவாகியாவின் மியா போஹன்கோவா மோதினர். அபாரமாக ஆடிய ஜானிஸ் டிஜென் 6-3, 6-1 என்ற செட் கணக்கில் வெற்றி பெற்று அரையிறுதிக்கு முன்னேறினார்.

மூன்றாவது காலிறுதியில் இத்தொடரின் 'நம்பர்-3' வீராங்கனை, குரோஷியாவின் டோனா வெகிச், ஆஸ்திரேலியாவின் கிம்பெர்லி பிர்ரெலை சந்தித்தார். இதில் வெகிச் 4-6, 0-6 என வீழ்ந்தார்.

இரட்டையர் பிரிவு காலிறுதியில் இந்தியாவின் வைஷ்ணவி அத்கர், மாயா ரேவதி ஜோடி 2-6, 1-6 என்ற நேர் செட் கணக்கில் இந்தோனேஷியாவின் அல்டிலா சுட்ஜியாடி, ஜானிஸ் டிஜென் ஜோடியிடம் தோல்வியடைந்தது.