இந்தியாவின் மும்பையில் பெண்களுக்கான சாலஞ்சர் கோப்பை டென்னிஸ் தொடர் நடக்கிறது. உலகத் தரவரிசையில் 250 வது இடத்திலுள்ள இந்தியாவின் ஸ்ரீவள்ளி ராஷ்மிகா, தகுதிச்சுற்றில் இருந்து பிரதான சுற்றுக்கு முன்னேறினார். நேற்று நடந்த முதல் சுற்றில் இவர், 93வது இடத்திலுள்ள, இத்தொடரில் 'நம்பர்-2' அந்தஸ்து பெற்ற ஜப்பானின் ஹிபினோவை சந்தித்தார்.

முதல் செட்டை 2-6 என ராஷ்மிகா இழந்தார். பின் அடுத்த செட்டை 6-1 என கைப்பற்றி பதிலடி தந்தார். 'டை பிரேக்கர்' வரை சென்ற மூன்றாவது, கடைசி செட்டை ராஷ்மிகா 7-6 என கைப்பற்றினார். முடிவில் ராஷ்மிகா 2-6, 6-1, 7-6 என்ற செட் கணக்கில் வெற்றி பெற்றார்.

மற்றொரு முதல் சுற்றில் இந்தியாவின் ருடுஜா போசாலே, தாய்லாந்தின் பிலிபியுச்சை 6-4, 7-5 என்ற நேர் செட் கணக்கில் சாய்த்து, அடுத்த சுற்றுக்குள் நுழைந்தார். இரட்டையர் பிரிவில் இந்தியாவின் பிரார்த்தனா தாம்ப்ரே, நெதர்லாந்தின் ஹர்டோனோ ஜோடி, 6-4, 2-6, 10-6 என தாய்லாந்தின் லுக்சிகா, பிலிபியுச் ஜோடியை வென்று காலிறுதிக்கு முன்னேறியது.