துபாயில், ஏ.டி.பி., சர்வதேச டென்னிஸ் சாம்பியன்ஷிப் நடந்தது. இதன் இரட்டையர் பைனலில் இந்தியாவின் யூகி பாம்ப்ரி, ஆஸ்திரேலியாவின் அலெக்சி பாபிரின் ஜோடி, பின்லாந்தின் ஹாரி ஹெலியோவாரா, பிரிட்டனின் ஹென்றி பாட்டன் ஜோடியை எதிர்கொண்டது.

முதல் செட்டை 3-6 என இழந்த இந்தியா, ஆஸ்திரேலியா ஜோடி, 'டை பிரேக்கர்' வரை சென்ற இரண்டாவது செட்டை 7-6 எனக் கைப்பற்றியது. வெற்றியாளரை நிர்ணயிக்கும் 'சூப்பர் டை பிரேக்கரில்' மீண்டும் அசத்திய பாம்ப்ரி ஜோடி 10-8 என வென்றது. ஒரு மணி நேரம், 51 நிமிடம் நீடித்த போட்டியில் யூகி பாம்ப்ரி, அலெக்சி பாபிரின் ஜோடி 3-6, 7-6, 10-8 என்ற கணக்கில் வெற்றி பெற்று சாம்பியன் பட்டத்தை தட்டிச் சென்றது.