தா.பழூர் அருகேயுள்ள விக்கிரமங்கலம் அரசு மேல்நிலைப் பள்ளியில் 450க்கும் மேற்பட்ட மாணவர்கள் பயின்று வருகின்றனர். அனைத்து தரப்பினர் பயின்று வரும் இப்பள்ளியில், மாணவர்களிடையே அவ்வப்போது தகராறு ஏற்பட்டு வருவதாகக் கூறப்படுகிறது.

இதனிடையே, அப்பள்ளியில் பயின்று வரும் உடையவர் தீயனூரைச் சேர்ந்த ஒரு தரப்பைச் சார்ந்த மாணவர்கள் விக்கிரமங்கலம் கடைவீதியில் பைக் ரேஸ் விடுவதும், மற்றொரு தரப்பைச் சேர்ந்த மாணவர்கள் அதனைத் தட்டிக் கேட்டு தகராறு செய்வதும் இருந்து வந்துள்ளது.

இந்நிலையில், அப்பள்ளியில் பிளஸ் 1ஏ வகுப்பில் ஒரு தரப்பைச் சேர்ந்த மாணவர் ஒருவர் அமர்ந்திருந்த போது, அங்கு வந்த மற்றொரு தரப்பைச் சேர்ந்த மாணவர்கள் தாக்கியுள்ளனர். இதனால் இரு தரப்பு மாணவர்களிடையே ஏற்பட்ட மோதல், இரு சமுதாய மக்களிடையே பரவியது.

இதுகுறித்து தகவல் அறிந்த விக்கிரமங்கலம் போலீசார் பள்ளிக்குச் சென்று இரு தரப்பு மாணவர்களிடம் விசாரணை நடத்தினர். விசாரணைக்கு பிறகு இரு தரப்பைச் சேர்ந்த தலா 9 பேர் வீதம் 18 மாணவர்கள் மீது வழக்குப் பதிந்து சிறுவர் சீர்திருத்த பள்ளிக்கு அழைத்துச் சென்றனர்.

இதற்கிடையே பள்ளிக்கு வந்த ஒரு தரப்பினர், மாணவர்கள் தாக்கி கொண்டதற்கு தீர்வுக் காணப்பட வேண்டும் எனக் கூறி விக்கிரமங்கலம், முத்துவாஞ்சேரி சாலையில் அமர்ந்து மறியலில் ஈடுபட்டனர். இதையறிந்த காவல் துறையினர் பேச்சுவார்த்தை நடத்தியதையடுத்து அனைவரும் கலைந்துச் சென்றனர். இதனால் அச்சாலையில் 4 மணி நேரம் போக்குவரத்து பாதிக்கப்பட்டது