கடற்பகுதி நீர்வழித் தடங்கள் வழியில் பயணியர், சரக்கு கப்பல்கள், மீன்பிடி படகுகள் ஆகியவை இயங்குகின்றன. இரவில் கடலின் நீர்வழித்தடங்கள் மற்றும் பயண திசையை அறிந்து செல்ல கலங்கரைவிளக்கங்கள், வழிகாட்டியாக பயன்படுகின்றன.

கடல்வழி போக்குவரத்து, வர்த்தகம், பாதுகாப்பு உள்ளிட்ட வகைகளில், கலங்கரைவிளக்க பங்களிப்பு முக்கியமானது. இந்திய கப்பல் போக்குவரத்து துறையின்கீழ் செயல்படும் கலங்கரைவிளக்கங்கள், விளக்கு கலங்கள் இயக்குனரகம், கலங்கரைவிளக்கங்களை இயக்குகிறது.

நாடு முழுதும் குறிப்பிட்ட கலங்கரைவிளக்கங்களை, இயக்குனரகம் சுற்றுலாவிற்கும் பயன்படுத்துகிறது. கலங்கரைவிளக்க மேல்தளத்திலிருந்து, சுற்றுபுற அழகை, பறவை பார்வையில் கண்டு ரசிக்கலாம் என்பதால், பயணியர் கலங்கரைவிளக்க சுற்றுலாவிற்கு ஆர்வம் காட்டுகின்றனர்.

தமிழகத்தில், மாமல்லபுரம், கன்னியாகுமரி உள்ளிட்ட பகுதிகளில் உள்ள கலங்கரைவிளக்கங்கள், சுற்றுலா சிறப்புடன் விளங்குகிறது.

அத்தகைய கலங்கரைவிளக்கங்களில், சுற்றுலா பயணியரை மேலும் கவர, லேசர் ஒளி - ஒலி காட்சி உள்ளிட்ட மேம்பாட்டு திட்டங்களை, அத்துறை செயல்படுத்த முடிவெடுத்துள்ளது.

கடந்த 2013 - 14ல் கலங்கரைவிளக்கங்களை பார்வையிட்ட பயணியர் எண்ணிக்கையைவிட, தற்போது பார்வையிட்ட பயணியர் எண்ணிக்கை 300 சதவீதம் அதிகரித்துள்ளதாக, அத்துறை தெரிவித்துள்ளது.

ஒடிசா மாநிலத்தில், இரண்டு நாட்கள் கலங்கரைவிளக்க விழா கொண்டாடப்படுகிறது. நேற்று விழா துவங்கி, இன்றும் நடக்கிறது. இதை முன்னிட்டு, நாடு முழுதும் சுற்றுலா சிறப்பு பெற்ற கலங்கரைவிளக்கங்களில், இரவில் வண்ண விளக்குகள் பொருத்தி ஒளிர்கின்றன.

இந்த விழாவை பயணியர் காண, நேரடியாக ஒளிபரப்பப்படுகிறது. பழங்காலத்தில் கலங்கரைவிளக்க உருவாக்கம், பயன்பாடு, இன்றைய முன்னேற்றம், அதன் சுற்றுலா மேம்பாடு உள்ளிட்டவை குறித்து விளக்கப்பட்டது.