செய்யூர் வட்டத்திற்கு உட்பட்ட, லத்துார் மற்றும் சித்தாமூர் ஒன்றியத்தில், 84 ஊராட்சிகள் உள்ளன.

30,000க்கும் மேற்பட்ட ஏக்கர் பரப்பளவு விவசாய நிலத்தைக் கொண்டு உள்ளது. விவசாயமே இப்பகுதி மக்களின் பிரதான தொழில்.

தற்போது சம்பா பருவத்தில், நெல் பயிர் சாகுபடி செய்யும் பணிகளில், விவசாயிகள் தீவிரமாக ஈடுபட்டு வருகின்றனர்.

இந்நிலையில், வானிலை மாற்றம் காரணமாக நடவு செய்யப்பட்டு வளர்ச்சி நிலையில் உள்ள நெற்பயிர்களை, இலை சுருட்டுப் புழுக்கள் பாதிக்க துவங்கி உள்ளன.

இதனால், இதற்கான முன்னெச்சரிக்கை நடவடிக்கைகள் மேற்கொள்ள விவசாயிகளுக்கு, வேளாண் துறை அறிவுரை வழங்கி உள்ளது.

இதுகுறித்து, பவுஞ்சூர் வட்டார வேளாண்மை உதவி இயக்குநர் சுரேஷ் கூறியதாவது:

தழைச்சத்து உரங்களை தவிர்க்க வேண்டும். 'கார்டாப் ஹைட்ரோகுளோரைடு' ஏக்கருக்கு 400 கிராம் வீதம், தேவையான மணலுடன் கலந்து நெற்பயிரில் துாவலாம்.

'குவினல் பாஸ்' ஏக்கருக்கு 300 முதல் 400 மி.லி., தேவையான தண்ணீரில் கரைத்து, தெளிப்பான் வாயிலாக நெல் பயிரில் தெளிக்கலாம்.

வேம்பு கரைசல் பயன் படுத்தியும், இலை சுருட்டு புழுவை கட்டுப் படுத்தலாம்.

இவ்வாறு அவர் கூறினார்.