திருவண்ணாமலை மாவட்டம், செய்யாறு அரசு கலை, அறிவியல் கல்லுாரியைச் சேர்ந்த வரலாற்று துறை விரிவுரையாளர் மதுரைவீரன், செங்கல்பட்டு பாலாற்று பகுதிகளில், தொடர்ந்து கள ஆய்வில் ஈடுபட்டு வருகிறார். இவர், தற்போதைய ஆய்வில், பண்டைய கால நாணயங்களைக் கண்டெடுத்துள்ளார்.

இதுகுறித்து, அவர் கூறியதாவது:

செங்கல்பட்டு மாவட்டத்தில், பாலாற்று பகுதிகளில் ஆய்வு நடத்தியதில், நாணயங்கள் கிடைத்துள்ளன. இதில், பல்லவர் காலத்தைச் சேர்ந்த கலப்பு உலோக நாணயத்தின் முன்புறத்தில், வலதுபுறம் நோக்கி நிற்கும் காளையின் உருவமும், அதன் மேற்புறம் ஸ்ரீவஸ்தம் சின்னமும் உள்ளன; பின்புறம், வெறுமனே உள்ளது.

விஜயநகர காலத்தைச் சேர்ந்த செம்பு நாணயத்தின் முன்புறத்தில், இடதுபுறம் நோக்கி நிற்கும் காளை உருவம் பொறிக்கப்பட்டு, அதைச்சுற்றி முத்துக்கள் கோர்த்த மாலை அலங்கரிக்கிறது. பின்புறம், கிருஷ்ணராயா என தெலுங்கு எழுத்துகளில் குறிப்பிடப்பட்டுள்ளது.

இவ்வாறு, அவர் கூறினார்.