திருப்போரூர் பேரூராட்சிக்கு உட்பட்ட ஏழாவது வார்டில், திருவஞ்சாவடி தெரு அமைந்துள்ளது. இங்குள்ள கெங்கையம்மன் கோவில் அருகே, நல்லான்செட்டிகுளம் உள்ளது.

இக்குளத்தில், வறட்சி காலத்திலும் தண்ணீர் வற்றாமல் இருக்கும். சுற்றுப்பகுதியின் நிலத்தடி நீர் ஆதாரமாக விளங்கும் இந்த குளம், கடந்த 10 ஆண்டு களுக்கு முன், படித்துறைகள் மற்றும் கரைகள் அமைத்து சீரமைக்கப்பட்டது. ஆனால், குளத்தை துார் வாரி பல ஆண்டுகள் ஆகின்றன.

தற்போது, குளத்தினுள் ஏராளமான ஆகாயத்தாமரை செடிகள் மற்றும் பாசிகளுடன் குப்பை கழிவுகள் அடர்ந்து காணப்படுகின்றன. குளத்தின் கரைப்பகுதியைச் சுற்றிலும் புதர் மண்டிக் கிடக்கின்றன.

எனவே, மேற்கண்ட குளத்தை துார் வாரி சீரமைக்க வேண்டும் என, அப்பகுதிவாசிகள் கோரிக்கை விடுத்துள்ளனர்.