திருப்போரூர் ஒன்றியத்தில் அடங்கிய குன்னப்பட்டு ஊராட்சியில் ஹிட்டாச்சி, அஜினமோட்டோ உள்ளிட்ட, 10க்கும் மேற்பட்ட நிறுவனங்கள் செயல்படுகின்றன.

இங்கிருந்து ஆனந்தபுரம் வழியாக அருங்குன்றம் மற்றும் மானாமதி செல்லும் சாலை கடுமையாக சேதமடைந்து உள்ளது. ஜல்லி கற்கள் பெயர்ந்து மோசமான நிலையில் உள்ளதால், வாகன ஓட்டிகள் தடுமாறி வருகின்றனர்.

மேலும், இச்சாலையின் அகலம் குறைவாக உள்ளதால், இரண்டு கனரக வாகனங்கள் எதிரெதிரே செல்லும் போது, சாலையைக் கடப்பதில் சிரமம் ஏற்படுகிறது.

இந்த நேரத்தில், பின்னால் வரும் மற்ற வாகன ஓட்டிகள் காத்திருந்து அவதிப்படுகின்றனர்.

சுற்றுவட்டார கிராமத்தினர் இந்த சாலையை அதிகமாக பயன்படுத்தும் நிலையில், சாலை மோசமாக உள்ளதால் கடும் பாதிப்பு ஏற்படுகிறது.

எனவே, இந்த சாலையை சீரமைக்க, நெடுஞ்சாலைத் துறையினர் நடவடிக்கை எடுக்க வேண்டும் என, வாகன ஓட்டிகள் கோரிக்கை விடுத்துள்ளனர்.