மாமல்லபுரத்தில் கடற்கரை கோவில், ஐந்து ரதங்கள், அர்ஜூனன் தபசு உள்ளிட்ட பல்லவர் கால சிற்பங்கள் உள்ளன. அவற்றை காண, உள்நாடு, சர்வதேச பயணியர் சுற்றுலா வருகின்றனர். வார இறுதி, அரசு விடுமுறை ஆகிய நாட்களில், சென்னை பகுதி பயணியர், இங்கு வருவது குறிப்பிடத்தக்கது.

வங்க கடலில் நிலைகொண்டுள்ள டிட்வா புயல் காரணமாக, கடந்த சில நாட்களாக, கனமழை பெய்து வருகிறது. பயணியர் வருகை குறைந்து, சுற்றுலா முடங்குவதாக, சுற்றுலா ஆர்வலர்கள் தெரிவித்தனர்.

இதுகுறித்து, அவர்கள் கூறியதாவது:

பலத்த காற்றுடன் மழை பெய்வதால், சுற்றுலா பயணியர் வருகை குறைந்துள்ளது. இப்போதுதான் வெளிநாட்டுப் பயணியர் சீசன் துவங்கியது. இலங்கை, இந்தியா என, இரண்டு நாடுகளுக்கும் சேர்த்தே திட்டமிட்டே சுற்றுலா வருவர்.

இலங்கை கனமழையால் பாதிக்கப்பட்டுள்ளதால், இந்தியாவிற்கும் வெளிநாட்டவர் வருவது தடைபடும். சீசனை நம்பியுள்ள மாமல்லபுரத்தில், வியாபாரிகள் பாதிக்கப்படுவர்.

இவ்வாறு, அவர்கள் கூறினர்.