தமிழக பல்கலை அணிகளுக்கு இடையிலான யுவா கபடி சாம்பியன்ஷிப் போட்டிகள், சென்னையை அடுத்த பொன்னேரியில் நடைபெற்றன.

மாநிலம் முழுதும் இருந்து 16 பல்கலை அணிகள் இதில் பங்கேற்றன.

சென்னை வேல்ஸ், கோவை கற்பகம், பிரிஸ்ட், என்.ஏ.அகாடமி ஆகிய 4 அணிகள் அரை இறுதிக்கு முன்னேறின.

முதல் அரை இறுதி ஆட்டத்தில் வேல்ஸ் பல்கலை அணி, 42---24 என்ற புள்ளி கணக்கில், என்.ஏ.அகாடமி அணியை வீழ்த்தியது.

அடுத்த அரையிறுதியில் கற்பகம் பல்கலை அணி, 36---33 என்ற புள்ளி கணக்கில், பிரிஸ்ட் பல்கலை அணியை தோற்கடித்தது.

நேற்று முன்தினம் நடந்த இறுதிப் போட்டியில், வேல்ஸ் பல்கலையுடன்- கற்பகம் பல்கலை அணி பலப்பரீட்சை நடத்தியது. இதில் தொடக்கம் முதல் ஆதிக்கம் செலுத்திய வேல்ஸ் பல்கலை, 49---19 என்ற புள்ளி கணக்கில் அபார வெற்றி பெற்றது. அந்த அணி தரப்பில் சதீஷ் கண்ணன் 12 புள்ளிகளை குவித்தார்.

சாம்பியன் பட்டம் வென்ற வேல்ஸ் பல்கலை அணிக்கு, 20 லட்சம் ரூபாய் பரிசுத் தொகை வழங்கப்பட்டது. இரண்டா-வது இடம் பிடித்த கற்பகம் பல்கலை அணி, 10 லட்சம் ரூபாய் பரிசாக பெற்றது.