அண்ணா பல்கலைக்கு உட்பட்ட கல்லுாரிகளை, பல்வேறு மண்டலங்களாக பிரித்து, மாநிலம் முழுதும் விளையாட்டு போட்டிகள் நடக்கின்றன.

அந்த வரிசையில், நான்காவது மண்டலத்திற்கான பேட்மின்டன் போட்டி, காட்டாங்கொளத்துாரில் உள்ள எஸ்.ஆர்.எம்., வள்ளியம்மை பொறியியல் கல்லுாரியில், நேற்று முன்தினம் நிறைவடைந்தது.

முதல் அரையிறுதியில், சாய்ராம் கல்லுாரி அணி, 3 - 0 என்ற செட் கணக்கில் எம்.ஐ.டி.,யையும், மற்றொரு அரையிறுதியில், எஸ்.ஆர்.எம்., வள்ளியம்மை கல்லுாரி, 3 - 0 என்ற செட் கணக்கி ல், சாய்ராம் இன்ஸ்டிடியூட் ஆப் டெக்னாலஜி அணியையும் தோற்கடித்தன.

அரையிறுதி ஆட்டங்கள் முடி வில், சாய்ராம் மற்றும் எஸ்.ஆர்.எம்., வள்ளியம்மை அணிகள், இறுதிப் போட்டியில் களமிறங்கின. விறுவிறுப்பான ஆட்டத்தில், சாய்ராம் கல்லுாரி, 3 - 2 என்ற செட் கணக்கில், எஸ்.ஆர்.எம்., வள்ளியம்மை அணியை தோற்கடித்து, சாம்பியன் பட்டத்தை வென்றது.

முன்னதாக நடந்த மூன்றாம் இடத்திற்கான ஆட்டத்தில், எம்.ஐ.டி., அணி, 3 - 0 என்ற செட் கணக்கில், சாய்ராம் இன்ஸ்டிடியூட் ஆப் டெக்னாலஜி அணியை வீழ்த்தி மூன்றாம் இடத்தை கைப்பற்றியது.