புளூ ஸ்கை கிரிக்கெட் போட்டியில், வால்வாரின்ஸ் சி.சி., அணி, 60 ரன்கள் வித்தியாசத்தில், சாகுல் காயிஸ் அணியை தோற்கடித்தது.

சென்னையில், தீ புளூ ஸ்கை கிரிக்கெட் அகாடமி சார்பில், ஸ்ரீ குருராகவேந்திரா 'லீக் கம் நாக் அவுட்' கிரிக்கெட் போட்டிகள் நடக்கின்றன. இவற்றில், ஒன்பது அணிகள் பங்கேற்று, தலா ஒவ்வொரு அணியும், எட்டு போட்டிகள் வீதம், 'லீக்' முறையில் மோதி வருகின்றன.

நேற்று முன்தினம், முகப்பேரில் உள்ள தனியார் கல்லுாரியில் நடந்த, 'லீக்' ஆட்டத்தில், வால்வாரின்ஸ் சி.சி., மற்றும் சாகுல் காயிஸ் அணிகள் எதிர்கொண்டன. 'டாஸ்' வென்ற சாகுல் காயிஸ் அணி, பந்து வீச்சை தேர்வு செய்தது.

முதலில் பேட்டிங் செய்த வால்வாரியன்ஸ் சி.சி., 19.3 ஓவர்களில் ஆல் அவுட் ஆகி, 163 ரன்களை அடித்தது. அடுத்து பேட்டிங் செய்த, சாகுல் காயிஸ் அணி, 19.1 ஓவர்கள் விளையாடி, போராடி 103 ரன்களை அடித்தது. இதனால், 60 ரன்கள் வித்தியாசத்தில், வால்வாரின்ஸ் அணி வெற்றி பெற்றது. போட்டிகள் தொடர்கின்றன.