அண்ணா பல்கலை கல்லுாரிகள், அரசு மற்றும் அரசு உதவிபெறும் இன்ஜினியரிங் கல்லுாரிகளில் உள்ள, பி.இ., -- பி.டெக்., படிப்புகளுக்கான அரசு ஒதுக்கீட்டு இடங்கள், 'ஆன்லைன்' கவுன்சிலிங் வாயிலாக நிரப்பப்படுகின்றன.

விண்ணப்பம்

இந்த கவுன்சிலிங்கை, டி.என்.இ.ஏ., என்ற இணையதளத்தின் வாயிலாக, தமிழக அரசின் தொழில்நுட்ப கல்வி இயக்ககம் நடத்துகிறது.

இந்நிலையில், பி.இ., -- பி.டெக்., படிப்பில் சேர விண்ணப்பித்துள்ள மாணவர்களுக்கு, கவுன்சிலிங் குறித்து வழிகாட்டும் வகையில், 'தினமலர்' நாளிதழ், சென்னை இன்ஸ்டிடியூட் ஆப் டெக்னாலஜி கல்வி நிறுவனத்துடன் இணைந்து நடத்தும், 'இன்ஜினியரிங் கவுன்சிலிங் வழிகாட்டி' நிகழ்ச்சி, இன்று காலை, 10:00 முதல் பகல், 1:00 மணி வரை, சென்னை தி.நகர் வாணி மகாலில் நடக்கிறது.

இந்நிகழ்ச்சியில், எந்த, 'கட் ஆப்' மதிப்பெண்ணுக்கு, எந்த கல்லுாரியில் இடம் கிடைக்க வாய்ப்பு உள்ளது; நவீன தொழில்நுட்ப படிப்புகளில் உள்ள வாய்ப்புகள் என்னென்ன; 'கோர்' இன்ஜினியரிங் துறைகளின் எதிர்காலம் எப்படி இருக்கும்.

ஆலோசனை

சிறப்பு இட ஒதுக்கீட்டிற்கான கலந்தாய்வு நடைமுறைகள் என்னென்ன என்பது குறித்து, கல்வி ஆலோசகர் ஆர்.அஸ்வின் ஆலோசனைகள் வழங்குகிறார்.

மேலும், ஆன்லைன் கவுன்சிலிங் அணுகுமுறைகள்; கவுன்சிலிங்கின் போது மாணவர்கள் பின்பற்ற வேண்டிய வழிமுறைகள்; கல்லுாரி மற்றும் பாடப்பிரிவை தேர்வு செய்யும் விதம்; வேலை வாய்ப்பு மிகுந்த படிப்புகள் என்னென்ன என்பது குறித்தும் தெரிவிக்கிறார்.

அதேபோல, ஆன்லைன் கவுன்சிலிங் நுணுக்கங்கள்; சரியாக, 'சாய்ஸ் பில்லிங்' பதிவிடுவதற்கான வழிமுறைகள்; 'புரொவிசனல் அலாட்மென்ட்' பெறுதல் குறித்து விளக்கம் அளிக்கிறார்.

நேரடியாக விளக்கம்

கவுன்சிலிங் முறையில், இந்த ஆண்டு செய்யப்பட்டுள்ள மாற்றங்கள் உள்ளிட்ட தகவல்கள் குறித்து, தமிழ்நாடு இன்ஜினியரிங் சேர்க்கை பிரிவு செயலர் டி.புருஷோத்தமன் விவரிக்கிறார்.

இதே நிகழ்ச்சி, இன்று மதியம், 2:30 முதல் 6:00 மணி வரை, குன்றத்துாரில் உள்ள சென்னை இன்ஸ்டிடியூட் ஆப் டெக்னாலஜி கல்வி நிறுவன வளாகத்திலும் நடைபெற உள்ளது.

நிகழ்ச்சிகளில் மாணவர்கள் தங்களின் பெற்றோருடன் பங்கேற்கலாம்.