காஞ்சிபுரம் மாவட்டம், அம்மையப்பநல்லுார் கிராமத்தைச் சேர்ந்தவர் பிலிப்ராஜ். இவர், தன் வீட்டுக்கு சொத்து வரி செலுத்த சென்றபோது, வரியை வசூலித்து, அதற்கு உரிய ரசீதை வழங்காமல், அதிகாரிகள் மறுத்துள்ளனர்.

இதுகுறித்து அதிகாரியிடம் மனு அளித்து கேட்டபோது, 'வீட்டுவரி ரசீது வழங்க கோரும் இடமானது, தற்போது உத்திரமேரூர் மாவட்ட சிவில் நீதிமன்றத்தில் வழக்கு நிலுவையில் உள்ளதால், வீட்டு வரி ரசீது வழங்க முடியாது' எனக்கூறி, உத்திரமேரூர் வட்டார வளர்ச்சி அலுவலர் மாணிக்கவேலு, பிப்., 20ல் உத்தரவு பிறப்பித்துள்ளார். இதை ரத்து செய்ய கோரியும், தனக்கு வீட்டுவரி ரசீது வழங்க கோரியும், சென்னை உயர் நீதிமன்றத்தில், பிலிப்ராஜ் வழக்கு தொடர்ந்தார். இந்த மனு, நீதிபதி வி.லட்சுமி நாராயணன் முன் விசாரணைக்கு வந்தது.

அப்போது மனுதாரர் தரப்பில் வழக்கறிஞர் ஏ.இளையபெருமாள் ஆஜராகி, ''நிலுவையில் இருக்கும் வழக்கை வாபஸ் பெறும் வரை, வீட்டு வரியை வசூலித்து, ரசீது வழங்க முடியாது எனக்கூறி, அதிகாரிகள் மனுதாரரை மிரட்டி உள்ளனர்,'' என்றார்.

இதை கேட்ட நீதிபதி, 'ஒரு அதிகாரி, தன் சட்டப்பூர்வ கடமையைச் செய்வதற்கு, நிலுவையில் உள்ள சிவில் வழக்கை வாபஸ் பெற வேண்டும் என நிபந்தனை விதிப்பதும், நீதிமன்ற அவமதிப்பு ஆகும் என, உச்ச நீதிமன்றம் உத்தரவு பிறப்பித்து உள்ளது' எனக்கூறி, வட்டார வளர்ச்சி அலுவலர் செயலுக்கு கண்டனம் தெரிவித்து, இதுகுறித்து விளக்கம் அளிக்க வேண்டும் என உத்தரவிட்டார்.

அதன்படி வட்டார வளர்ச்சி அலுவலர் நேரில் ஆஜரானார். அதையடுத்து, சொத்து வரியை வசூலிக்க இயலாது என பிறப்பித்த உத்தரவை, கடந்த 19ம் தேதி வட்டார வளர்ச்சி அலுவலரால் வாபஸ் பெறப்பட்டுள்ளது எனக்கூறி, அது தொடர்பான உத்தரவை, அரசு வழக்கறிஞர் நீதிமன்றத்தில் சமர்ப்பித்தார்.

இதை பார்த்த நீதிபதி, மனுதாரரிடம் சொத்துவரி வசூலிக்க வேண்டும் எனக்கூறி, வழக்கை முடித்து வைத்து உத்தரவிட்டார்.