அந்த வகையில், மாணவர்களுக்கான மாநில கபடி போட்டி, அரும்பாக்கம் கல்லுாரி வளாகத்தில், கடந்த இரண்டு நாட்கள் நடந்தது.

இதில், சென்னை, திருவள்ளூர், கன்னியாகுமாரி என, பல்வேறு மாவட்டங்களில் இருந்து, அரசு மற்றும் தனியார் பள்ளிகளை சேர்ந்த மாணவ - மாணவியர் பங்கேற்றனர்.

முதல் அரையிறுதியில், விருகம்பாக்கம் அரசு பள்ளி மற்றும் வண்ணாரப்பேட்டை பி.சி.எஸ்., ஜெயின் பள்ளி மோதின. அதில், 44 - 24 என்ற கணக்கில், விருகம்பாக்கம் அரசு பள்ளி வெற்றி பெற்று, இறுதிப் போட்டிக்கு தகுதிபெற்றது.

மற்றொரு அரையிறுதியில், மதுராந்தகம் விவேகானந்தா வித்யாலயா பள்ளி, 39 - 30 என்ற கணக்கில், சவுகார்பேட்டை ஏ.ஜி.ஜெயின் பள்ளியை தோற்கடித்தது.

விறுவிறுப்பான இறுதிப் போட்டியில், விருகம்பாக்கம் அரசு பள்ளி மற்றும் மதுராந்தகம் விவேகானந்தா வித்யாலயா பள்ளிகள் பலப்பரீட்சை நடத்தின.

துவக்கத்தில் இருந்தே, விருகம்பாக்கம் அரசு பள்ளி மாணவர்கள் ஆதிக்கம் செலுத்தினர். முடிவில், 50 - 23 என்ற அபார புள்ளிக் கணக்கில், விருகம்பாக்கம் அரசு பள்ளி வெற்றி பெற்றது.

மூன்றாம் இடத்திற்கான ஆட்டத்தில், சவுகார்பேட்டை ஏ.ஜி.ஜெயின் பள்ளி, 47 - 43 என்ற கணக்கில் வண்ணாரப்பேட்டை பி.சி.எஸ்., ஜெயின் பள்ளியை வீழ்த்தியது.

போட்டியில் வெற்றி பெற்ற அணிகளுக்கு, கல்லுாரி அறக்கட்டளையின் செயலர் அசோக் குமார் முந்த்ரா, பொருளாளர் அசோக் கேடியா, கல்லுாரி முதல்வர் சந்தோஷ்பாபு ஆகியோர் பரிசுகள் வழங்கினர்.