விசாரித்த நீதிமன்றம், ஆக்கிரமிப்புகளை இடித்து அகற்ற உத்தரவிட்டது. இதையடுத்து, 2024ம் ஆண்டு, வருவாய் துறையினர், போலீஸ் பாதுகாப்புடன், ஊராட்சி தலைவர் ஜெகதீஸ்வரன் வீட்டின் ஒரு பகுதியை மட்டும் இடித்து, கணக்கு காட்டினர்.

பாதிக்கப்பட்டோர், தடை உத்தரவு கோரி, சென்னை உயர் நீதிமன்றத்தில் வழக்கு தொடர்ந்தனர். அவ்வழக்கை நீதிமன்றம் தள்ளுபடி செய்துவிட்டதாக கூறப்படுகிறது.

அரசு இடத்தை ஆக்கிரமித்து வீடுகள் கட்டப்பட்டுள்ளது தொடர்பாக, சமூக ஆர்வலர் சந்தானம், நீதிமன்றத்தில் மேல்முறையீடு செய்தார். இவ்வழக்கு இன்று விசாரணைக்கு வர உள்ளது.

வாக்குவாதம் வழக்கு விசாரணையின்போது, செங்கல்பட்டு கலெக்டர், தாம்பரம் தாசில்தார் உள்ளிட்ட அதிகாரிகள் ஆஜராக வேண்டிய நிலைமை ஏற்பட்டுள்ளது.

இதனால், ஆக்கிரமிப்பு கட்டடங்களை இடித்து, 'நாங்கள் வேலை செய்து விட்டோம்' என, நீதிமன்றத்தில் கணக்கு காட்ட, வருவாய் துறை அதிகாரிகள் முடிவு செய்தனர்.

நேற்று காலை, 100க்கும் மேற்ப்பட்ட போலீஸ் பாதுகாப்புடன், வருவாய் துறை அதிகாரிகள், 'பொக்லைன்' இயந்திரத்துடன் அகரம்தென் பகுதிக்கு சென்றனர்.

ஏற்கனவே, ஒரு பகுதி இடிக்கப்பட்ட நிலையில் உள்ள கட்டடத்தை ஒட்டியுள்ள, மூன்று மாடி கட்டடத்தை, பொக்லைன் இயந்திர உதவியுடன் இடிக்கும் பணியில் ஈடுபட்டனர்.

அப்போது, அகரம்தென் ஊராட்சி தலைவர் ஜெகதீஸ்வரன் மற்றும் அவரது ஆதரவாளர்கள் அங்கு கூடி, வருவாய் துறையினர் மற்றும் போலீசாருடன் வாக்குவாதத்தில் ஈடுபட்டனர்.

ஜெகதீஸ்வரனின் உறவினர்கள், மூன்றாவது மாடிக்கு சென்று, கீழே குதிப்பதாகவும், உடலில் பெட்ரோல் ஊற்றி தீக்குளித்து, தற்கொலை செய்து கொள்ளப் போவதாகவும் மிரட்டினர்.

கல் வீச்சு பின், அங்கு கிடந்த கற்கள், ஓடுகள், கட்டைகளை எடுத்து, கீழே இருந்த அதிகாரிகள் மீது வீசினர். தொடர்ந்து, குப்பைக்கு தீ வைத்து, கீழே வீசினர்.

இதற்கிடையில், அந்த கட்டடத்தின் ஒரு பகுதியை இடித்த வருவாய் துறையினர், சிறிது துாரத்தில் உள்ள, பயன்பாட்டில் இல்லாத பழமையான ஊராட்சி கட்டடத்தை இடிக்க சென்றனர். அங்கும் வந்த ஜெகதீஸ்வரன் மற்றும் அவரது ஆதரவாளர்கள், அதற்கு எதிர்ப்பு தெரிவித்து போராட்டம் நடத்தினர்.

'ஊராட்சி கட்டடம் உள்ள இடம் நீர்நிலை என்றால், அதை ஒட்டியுள்ள கட்டடங்களையும் இடிக்க வேண்டும்' என, அவர்கள் போர்க்கொடி உயர்த்தினர். பிரச்னை பெரிதானதை அடுத்து, வருவாய் துறையினர் ஆக்கிரமிப்பு அகற்றும் பணியை பாதியில் கைவிட்டு கலைந்து சென்றனர்.