படிப்பு, வேலை, மருத்துவம், தொழில் நிமித்தமாக தினமும் ஆயிரக்கணக்கானோர், வெளி மாநிலம், மாவட்டங்களில் இருந்து சென்னைக்கு வருகின்றனர். இவர்களுக்காக, சென்னையில் 800க்கும் மேற்பட்ட விடுதிகள் உள்ளன.

விடுதிகளை சுகாதாரமாக வைத்திருப்பதை உறுதி செய்ய, ஆண்டுதோறும், மாநகராட்சியில் இருந்து சுகாதார சான்று பெற வேண்டும். கட்டட உறுதி சான்று, தீயணைப்பு துறை சான்று, குடிநீர் பரிசோதனை சான்றுடன் விண்ணப்பித்தால், மாநகராட்சியில் சுகாதாரத்துறை அதிகாரிகள் கள ஆய்வு செய்வர்.

அப்போது, காற்றோட்ட வசதி, தங்கி இருப்போரின் எண்ணிக்கைக்கு ஏற்ப கழிப்பறை வசதி, கழிவுநீர் வெளியேறும் வசதி, சமையல் அறை கட்டமைப்பு, வாகன நிறுத்தம் போன்றவை ஆய்வு செய்து, அவை சரியாக இருந்தால், சுகாதார சான்றிதழ் வழங்கப்படும்.

இந்நிலையில், 'சுய சுகாதார சான்றிதழ்' வழங்கும் திட்டம், கடந்த ஜூன் மாதம் அறிவிக்கப்பட்டது. அதன்படி விடுதி உரிமையாளர்கள், கட்டட உறுதி தன்மை, தீயணைப்பு துறை சான்றிதழ்களை தாங்களாகவே பதிவேற்றம் செய்து, இ - சேவை மையம் வழியாக சுய சுகாதார சான்றிதழ் பெற்றுக்கொள்ளலாம் எனவும் தெரிவிக்கப்பட்டது.

இதனால் கட்டட உரிமையாளர்கள், அனைத்து வசதிகளும் இருப்பதாக 'தகுந்த' ஆவணங்களை தயார் செய்து, இ - சேவை வழியாக பதிவேற்றம் செய்து, சுய சுகாதாரச் சான்று பெற்றுக்கொள்கின்றனர்.

ஒரு வீட்டில் 20 பேர்

தவிர, விதிமீறி செயல்படும் விடுதிகள், ஏற்கனவே சுகாதார சான்று கேட்டு விண்ணப்பித்து நிராகரிக்கப்பட்ட விடுதிகள், தற்போது மிகவும் எளிமையாக சுய சுகாதார சான்றிதழ் பெறுவதாக புகார் எழுந்துள்ளது. குறிப்பாக, விடுதிகளின் தேவை அதிகரித்துள்ளதால், பல வீடுகள் விடுதிகளாக மாற்றப்பட்டு வருகின்றன.

அந்த வகையில் சென்னை மற்றும் புறநகர் பகுதிகளில், பல கட்டுமான பணிகள் நடந்து வருகின்றன. இதில் பணிபுரியும் ஊழியர்களை, ஆங்காங்கே வீடுகளை வாடகைக்கு எடுத்து தங்க வைத்துள்ளனர். ஐந்து பேர் தங்கிய ஒரு வீட்டில், 15, 20 பேரை தங்க வைக்கின்றனர்.

அதுவும், கோவில், பள்ளி, மருத்துவமனை அருகில் உள்ள வீடுகளை விடுதிகளாக மாற்றுவதால், குடிநீர், கழிவுநீர், சுகாதார பிரச்னைகள் அதிகரிக்கின்றன.

குறிப்பாக, குழாயில் அடைப்பு ஏற்படுவதால், கழிவுநீர் செல்ல வழியின்றி 'மேன்ஹோல்' மூடி வாயிலாக வெளியேறி சாலையில் ஓடி சுகாதார சீர்கேடை ஏற்படுத்தி வருகிறது. இதனால் அருகாமை வீட்டு வாடகைதாரர்கள் அதிகம் பேர் பாதிக்கப்படுகின்றனர்.

கட்சிகள் ஆதரவு

வீடுகளை, விடுதிகளாக மாற்றும் சட்ட விரோத செயலுக்கு, மாநகராட்சி மற்றும் மாவட்ட நிர்வாகம் தடை ஏற்படுத்தாமல், அதற்கு ஒத்துழைப்பு வழங்கி வருவதாக புகார் எழுந்துள்ளது.

இதுகுறித்து, சுகாதாரத்துறை அதிகாரிகள் கூறியதாவது:

சுயசுகாதார சான்று பெற்ற விடுதிகளை ஆய்வு செய்ய உரிய அதிகாரம் வழங்கவில்லை. விதிமீறி சான்றிதழ் வாங்கி இருந்தால், என்ன நடவடிக்கை எடுக்க வேண்டும்; சான்றிதழை ரத்து செய்வதா, அபராதம் விதிப்பதா, எச்சரிக்கை செய்வதா போன்ற எந்த உத்தரவும் பிறப்பிக்காததால், அதுபோன்ற விடுதிகளை ஆய்வு செய்ய முடியவில்லை.

மீறி ஆய்வுக்கு சென்றால், விடுதி உரிமையாளர்கள், அனைத்து ஆவணங்களையும் தாக்கல் செய்துதான் சான்றிதழ் வாங்கி உள்ளோம் எனக்கூறி, உள்ளேவிட மறுக்கின்றனர்.

ஒரே சான்று

அதையும் மீறி கட்டடத்திற்குள் சென்றால் கைகலப்பாகிறது. அவர்களுக்கு ஆதரவாக, சில கட்சி நிர்வாகிகளும், கவுன்சிலர்களும் செயல்படுகின்றனர்.

குடிநீர் பரிசோதனை செய்யாவிட்டால், விடுதியில் தங்கியிருப்போருக்கு வயிற்றுப்போக்கு, நோய் தொற்று பாதிப்பு ஏற்படும் அபாயம் உள்ளது.

விதிமீறி செயல்படும் பல விடுதிகளில், கட்டடம் உறுதி இல்லாமை, கொசு உற்பத்தி, டெங்கு, மலேரியா போன்ற நோய் பாதிப்பு ஏற்பட்டால், ஏன் தடுப்பு நடவடிக்கை எடுக்கவில்லை என, உயர் அதிகாரிகள் எங்கள் மீது நடவடிக்கை எடுக்கின்றனர்.

சுய சுகாதார சான்றிதழ் வாங்கிய கட்டடங்களை ஆய்வு செய்ய, உரிய அதிகாரத்துடன் உத்தரவு பிறப்பிக்க வேண்டும். அப்போதுதான் சுகாதாரம் சார்ந்த பிரச்னைக்கு உரிய நடவடிக்கை எடுக்க முடியும்.

இவ்வாறு அவர்கள் கூறினர்.