கோயம்பேடு 100 அடி சாலையில், 'டென் ஸ்கொயர்' வணிக வளாகத்தில் மத்திய அரசின் 'ஆதார்' சேவை மையம் இயங்கி வந்தது.

இங்கு ஆதார் பதிவு, பெயர், முகவரி மாற்றம் உள்ளிட்ட பணிகள் மேற்கொள்ளப்பட்டன. இ - சேவை மையங்களில் தீர்வு காண முடியாத பிரச்னைகளுக்கு, இங்கு தீர்வு காணப்பட்டது.

எனவே, மாநிலம் முழுதும் இருந்து, இங்கு பொதுமக்கள் வந்து ஆதார் தொடர்பான பிரச்னை களுக்கு தீர்வு காண்கின்றனர். இதற்கென பல்வேறு கவுன்டர்கள் அமைக்கப்பட்டு உள்ளது.

இங்கு 'டோக்கன்' வினியோகம் செய்து பொதுமக்களின் கோரிக்கைகள் நிறைவேற்றப்படுகிறது.

ஆனால், இந்த கட்டடத்திற்கு வருவதற்கு பொதுமக்கள் 'பார்க்கிங்' உள்ளிட்ட கட்டணம் செலுத்த வேண்டியுள்ளது. இந்நிலையில், கோயம்பேடில் இயங்கிவந்த ஆதார் சேவை மையம், திடீரென இடமாற்றம் செய்யப்பட்டு உள்ளது.

அண்ணாநகர் கிழக்கில் எச் 1 பிளாக், மூன்றாவது அவென்யூவில் உள்ள தமிழ்நாடு நகர்ப்புற உள்கட்டமைப்பு நிதி சேவைகள் நிறுவன கட்டடத்தின் முதல் தளத்தில், வரும் 15ம்தேதி முதல் செயல்படும் என அறிவிக்கப்பட்டு உள்ளது.

இதற்காக, கடந்த 28ம் தேதி முதல், ஆதார் சேவை மையத்தின் செயல்பாடுகள் நிறுத்திவைக்கப்பட்டு உள்ளது.

எஸ்.ஐ.ஆர்., உள்ளிட்ட செயல்பாடுகளுக்கு ஆதார் தேவைப்படுவதால், பலரும் அதற்கான முயற்சிகளில் இறங்கியுள்ளனர்.

ஆனால், சேவை மைய செயல்பாடுகள் நிறுத்திவைக்கப்பட்டுள்ளதால் பலரும் பாதிக்கப்படுகின்றனர். புதிய சேவை மையத்தை விரைந்து துவங்குவதற்கு, மத்திய தகவல் தொழிற்நுட்பத்துறை விரைந்து நடவடிக்கை எடுக்க வேண்டும் என, கோரிக்கை வலுத்துள்ளது.