மடிப்பாக்கம் கைவேலி பெரியார் நகரைச் சேர்ந்தவர் ஆன்டனி, 35; ‘டாடா ஏஸ்’ ஓட்டுநர். இவரது உறவினர் ஜெயசீல் ராஜ், 22; கார் ஓட்டுநர். ஆன்டனி, கடந்த இரு வாரங்களுக்கு முன் ஜெயசீல் ராஜிடம் 2,000 ரூபாய் கடன் வாங்கியுள்ளார்.

இதில் 1,000- ரூபாயை திருப்பிச் செலுத்திய நிலையில், மீதமுள்ள 1,000- ரூபாயை பணப் பரிவர்த்த்னை செயலியான, ‘கூகுள் பே’ மூலம் நேற்று முன்தினம் இரவு அனுப்பியுள்ளார்.

இந்நிலையில், நேற்று முன்தினம் இரவு 10:30 மணியளவில் இருவரும் மதுபோதையில் இருந்தபோது, பணம் கிடைக்கவில்லை எனக் கூறி ஆன்டனியிடம் ஜெயசீல் ராஜ் தகராறில் ஈடுபட்டுள்ளார். வாக்குவாதம் முற்றியதில் ஆத்திரமடைந்த அவர், கீழே கிடந்த மரக்கட்டையை எடுத்து ஆன்டனியின் தலையில் பலமாகத் தாக்கினார்.

பலத்த காயமடைந்த ஆன்டனி, மடிப்பாக்கம் சரஸ்வதி மருத்துவமனையில் எட்டு தையல்களுடன் சிகிச்சை பெற்றார். புகாரின்படி, மடிப்பாக்கம் போலீசார் வழக்குப் பதிவு செய்து, ஜெயசீல் ராஜை நேற்று கைது செய்து சிறையில் அடைத்தனர்.