மாநகராட்சியில் உள்ள 70 வார்டுகளில், 38 வார்டுகளில் பாதாள சாக்கடை திட்டம் பயன்பாட்டில் உள்ளது. 11 வார்டுகளில் பணிகள் நடந்து வருகின்றன. எஞ்சிய, 21 வார்டுகள் அடங்கிய பெருங்களத்துார், பீர்க்கன்காரணை, சிட்லப்பாக்கம், மாடம்பாக்கம், செம்பாக்கம் பகுதிகளில், பாதாள சாக்கடை திட்டத்தை செயல்படுத்த வேண்டும்.

இந்நிலையில், 2024 - 25 சட்டசபை கூட்டத்தொடரில், நகராட்சி நிர்வாகத் துறை மானிய கோரிக்கையின்போது, 'தாம்பரம் மாநகராட்சியில், மாடம்பாக்கம், சிட்லப்பாக்கம், செம்பாக்கம் பகுதிகளில், 750 கோடி ரூபாய் செலவில் பாதாள சாக்கடை திட்டம் அமைக்கப்படும்' என அறிவிப்பு வெளியிடப்பட்டது.

அதேநேரத்தில், பெருங்களத்துார், பீர்க்கன்காரணை பகுதிகளையும் இணைத்து, திட்டத்தை செயல்படுத்த வேண்டும் என, கோரிக்கை எழுந்தது.

இதையடுத்து, மேற்கண்ட பகுதிகளில் பாதாள சாக்கடை திட்டத்தை செயல்படுத்த, 892 கோடி ரூபாய் மதிப்பில் திட்ட அறிக்கை தயார் செய்யப்பட்டு, அரசிடம் சமர்ப்பிக்கப்பட்டுள்ளது. விரைவில் அனுமதி கிடைக்கும் என, எதிர்பார்க்கப்படுகிறது.

விடுபட்ட பகுதிகளில் பாதாள சாக்கடை திட்டத்தை செயல்படுத்த, 892 கோடி ரூபாய் செலவில், திட்ட அறிக்கை தயார் செய்யப்பட்டுள்ளது. அரசிடம் இருந்து அனுமதி கிடைத்தவுடன், 'டெண்டர்' கோரப்பட்டு பணிகள் துவக்கப்படும். - பாலசந்தர், கமிஷனர், தாம்பரம் மாநகராட்சி.