சென்னை மாநகர போக்குவரத்து கழகத்தில் இயக்கப்படும், 3,000க்கும் மேற்பட்ட பேருந்துகளில், தினமும், 32 லட்சத்துக்கும் மேற்பட்டோர் பயணிக்கின்றனர். மாநகர பேருந்து சேவையில், பயணியருக்கு அவ்வப்போது சிரமம் ஏற்படுகிறது.

நீண்ட நேரம் காத்திருப்பு

பேருந்துகள் உரிய நேரத்தில் இயக்கப்படாதது,உரிய நிறுத்தங்களில் நிறுத்தாமல் செல்வது, மாணவர்களை கண்டதும்நீண்ட துாரம் சென்று நிறுத்துவது, மொபைல் போனில் பேசிக்கொண்டும், பாட்டுக் கேட்ட படியும் பேருந்துகளை இயக்குவது, சில்லரை இல்லை என பயணியரை திட்டித் தீர்ப்பது என, ஓட்டுனர், நடத்துனரின் செயல்பாடுகள் பயணியரிடம் வெறுப்பை ஏற்படுத்தி வருகிறது.

இது தொடர்பான புகார்கள் அதிகரித்ததால், மாநகர போக்குவரத்து கழகம், தனியார் நிறுவனம் வாயிலாக, கடந்த மாதம், 'சர்வே' நடத்தியது.

இந்த சர்வேயின் போது, ஓட்டுனர், நடத்துனர்களின் செயல்பாடுகள் குறித்து, பயணியர் பல்வேறு புகார்களை அடுக்கினர். இதை அறிக்கையாக பெற்ற மாநகர போக்குவரத்துக் கழகம், ஓட்டுனர், நடத்துனர்களின் செயல்பாடுகளை ரகசியமாக கண்காணிக்க துவங்கியுள்ளது.

பேருந்துகளில் பயணித்தும், முக்கிய பேருந்து நிலையங்கள், நிறுத்தங்களில் சாதாரண பயணியரை போல் நின்றவாறும், அதிகாரிகள் ரகசியமாக கண்காணித்து வருகின்றனர்.

இதுகுறித்து, மாநகரபோக்குவரத்து கழக அதிகாரிகள் கூறியதாவது:

கடந்த மாதம் பயணியரிடம் சர்வே நடத்தப்பட்டது. அதில் முக்கியமாக தெரியவந்த பிரச்னைகள்:

நெரிசல் மிக்க வழித்தடங்களில் பேருந்துகளை அதிகரிக்க வேண்டும். புதிய வழித்தடங்களில் பேருந்துகளை இயக்க வேண்டும்.

ஓட்டுனர், நடத்துனர்கள் சிலர் விதிகளை பின்பற்றுவதில்லை. நிறுத்தங்களில் நிற்காமல் செல்கின்றனர்; அலுவலகநேரங்களில் பேருந்துகள் வருவதில்லை. நீண்ட நேரம் காத்திருந்த பின், ஒன்றன் பின் ஒன்றாக மூன்று பேருந்துகள் வருகின்றன.

தினமும் ஆய்வு

இவை உள்ளிட்ட புகார்களை தெரிவித்தனர். இதன் அடிப்படையில், உண்மை தன்மையை ஆய்வு செய்து, நடவடிக்கை எடுத்து வருகிறோம்.

புதிய பேருந்துகள் வந்தவுடன், படிப்படியாக சேவையை அதிகரிக்கஉள்ளோம். இதற்கிடையே, மாநகர பேருந்து ஓட்டுனர், நடத்துனர்களின் செயல்பாடுகளை, ஆங்காங்கே அதிகாரிகள் கண்காணித்து வருகின்றனர்.

பேருந்து நிறுத்தத்தில் சரியாக நிறுத்தி பயணியரை ஏற்றி, இறக்கி விடுகின்றனரா அல்லது தள்ளி நிறுத்துகின்றனரா; பயணியர் கேட்கும் இடத்தில் பேருந்தை நிறுத்துகின்றனரா என்றெல்லாம் கண்காணிக்கின்றனர்.

அதுபோல், மொபைல் போன் மற்றும் ஹெட்போனை பயன்படுத்தியபடி பணியில் ஈடுபடுகின்றனரா என்பதெல்லாம், ஓட்டுனர் மற்றும் நடத்துனரின் கவனத்துக்கு தெரியாமல், ஆய்வு செய்கின்றனர். இந்த ஆய்வு தினமும் நடக்கிறது.

குற்றச்சாட்டில் சிக்கும், பேருந்து ஓட்டுனர், நடத்துனர்கள் மீது 29 நாட்கள், 'சஸ்பெண்ட்' மற்றும் மெமோ, பணியிட மாற்றம் போன்ற நடவடிக்கைகள் எடுக்கப்படுகின்றன. மற்ற விதிமுறை மீறல்களில் ஈடுபடுவோர் மீது, ஒழுங்கீன நடவடிக்கை எடுக்கப்படும்.

இவ்வாறு அவர்கள் கூறினர்.

நடவடிக்கை எடுக்கலாம்!

தவறு செய்யும் பேருந்து ஓட்டுனர், நடத்துனர்கள் மீது நடவடிக்கை எடுக்கலாம்; தவறில்லை. ஆனால், பெரிய தண்டனையாக அமைந்துவிடக்கூடாது. முதலில் அறிவுரைகளை வழங்கலாம். தொடர்ந்து தவறு செய்யும்பட்சத்தில் நடவடிக்கை எடுக்கலாம். பயணியர் மத்தியில், திடீரென பேருந்தில் ஏறும் அதிகாரிகள், நடத்துனர் வைத்திருக்கும், 'கேஸ் பேக்'கை வாங்கி சோதனை செய்கின்றனர். நாங்கள் ஏதோ குற்றம் செய்வதுபோல், பயணியர் மத்தியில் எண்ணம் ஏற்படுகிறது. இதெல்லாம், ஓட்டுனர், நடத்துனர்களுக்கு மன உளைச்சலை ஏற்படுத்துகிறது.

- காமராஜர்

செயலர், தமிழ்நாடு அரசு போக்குவரத்து கழக

'ஸ்டாப் கரப்ஷன்' தொழிற்சங்க பேரவை.