ADDED : பிப் 14, 2026 05:15 AM

செஸ் போட்டியில் சிறுவர்கள் அசத்தல்
செ ங்கல்பட்டு மாவட்ட சதுரங்க சங்கம் சார்பில், செங்கை மாவட்ட அளவிலான சதுரங்க போட்டி, தாம்பரத்தில் உள்ள பிரின்ஸ் வெங்கடேஸ்வரா கலை கல்லுாரி வளாகத்தில் நடந்தது. 500க்கும் மேற்பட்ட சிறுவர்கள் பங்கேற்றனர்.
சிறுவர் 7 வயது பிரிவில், நிஹான் நிதிஷ், சிறுமியரில் அனிகா முதலிடங்களை கைப்பற்றினர். 11 வயது பிரிவில் சிறுவரில் லிஷாந்த், சிறுமியரில் சாத்விகா; 15 வயதில் சிறுவரில் சாய் அபினவ் குச்சிபோட்லா, சிறுமியரில் மிருணாளனி ஆகியோர் முதலிடங்களை வென்றனர். சிறுவர் 19 வயதில், சாய் கிருஷ்ணா, சிறுமியரில் பத்மினி ஆகியோர் வெற்றி பெற்றனர். முதலிரண்டு இடங்களை பிடித்தோர், மாநில போட்டியில் செங்கல்பட்டு அணிக்காக பங்கேற்க தகுதி பெற்றனர்.
எஸ்.ஆர்.எம்., அணி
கால்பந்தில் சாம்பியன்
பி .எஸ்.அப்துர் ரஹ்மான் கிரசண்ட் அறிவியல் மற்றும் தொழில்நுட்ப நிறுவனம் சார்பில், மாநில அளவில் ஆடவருக்கான பவுண்டர் கோப்பை கால்பந்து போட்டி, சென்னை, வண்டலுாரில் உள்ள கிரசண்ட் கல்லுாரி மைதானத்தில் நடந்தது. பல்வேறு மாவட்டங்களைச் சேர்ந்த 16 அணிகள் பங்கேற்றன.
இதன் அரையிறுதியில், காட்டாங்கொளத்துார் எஸ்.ஆர்.எம்., அணி, 1 - 0 என்ற கோல் கணக்கில் நாசரேத் கல்லுாரியை வீழ்த்தி, இறுதிப்போட்டிக்கு தகுதி பெற்றது.
இறுதிப்போட்டியில் எஸ்.ஆர்.எம்., - அமெட் பல்கலை அணிகள் மோதின. விறுவிறுப்பான போட்டியில், எஸ்.ஆர்.எம்., பல்கலை அணி 3 - 0 என்ற கோல் கணக்கில் வெற்றி பெற்று, சாம்பியன் பட்டத்தை கைப்பற்றி அசத்தியுள்ளது.
