ஆர்.எம்.கே., பாடசாலை பள்ளி சார்பில், சி.பி.எஸ்.இ., பள்ளிகளுக்கு இடையிலான கூடைப்பந்து போட்டி, திருவள்ளூர் மாவட்டம் கவரைப்பேட்டையில் உள்ள பள்ளி வளாகத்தில் நடக்கிறது.

மாநிலம் முழுதும் இருந்து, 200 பள்ளிகளில் இருந்து, 5,000 மாணவ - மாணவியர் பங்கேற்றுள்ளனர். இதில், 14, 17 மற்றும் 19 வயது பிரிவினருக்கு தனித்தனியாக போட்டிகள் நடக்கின்றன.

நேற்று காலை நடந்த 14 வயது மாணவியருக்கான அரையிறுதியில், பருத்திப்பட்டு வேலம்மாள் அணி, 19 - 15 என்ற கணக்கில் கே.கே., நகர் பி.எஸ்.பி.பி., அணியை தோற்கடித்து, இறுதிப் போட்டிக்கு தகுதி பெற்றது.

அதேபோல், மாணவர்கள் பிரிவில் பொன்னேரி வேலம்மாள் அணி, 76 - 59 என்ற கணக்கில் ஆலப்பாக்கம் வேலம்மாள் அணியை வீழ்த்தி தகுதி பெற்றது.

மாணவருக்கான 17 வயது பிரிவில், ஆலப்பாக்கம் வேலம்மாள் அணி, 67 - 41 என்ற கணக்கில், மதுரை கவி சர்வதேச பள்ளியையும், மற்றொரு அரையிறுதியில், பொன்னேரி வேலம்மாள் அணி, 39 - 15 என்ற கணக்கில் எஸ்.பி.ஓ.ஏ., பள்ளியையும் வீழ்த்தின. மாணவியர் பிரிவில், டி.ஏ.வி., அணி, 50 - 32 என்ற கணக்கில் பவன்ஸ் பள்ளியை வென்றது.

அதே மாணவர் பிரிவில், 19 வயதில், ஆலப்பாக்கம் வேலம்மாள் அணி, 48 - 28 என்ற கணக்கில், நுங்கம்பாக்கம் பத்மா ஷேசாத்திரி அணியை வீழ்த்தி இறுதிப் போட்டிக்கு தகுதி பெற்றது.