அசாம் மாநிலத்தில் நடந்த சர்வதேச ஸ்குவாஷ் சாம்பியன்ஷிப் போட்டியில், சென்னை எஸ்.ஆர்.எம்., பல்கலையின் சமீனா ரியாஷ் சாம்பியன் பட்டத்தை கைப்பற்றினார்.

அசாம் ஸ்குவாஷ் மற்றும் ராக்கெட் சங்கம், இந்திய ஸ்குவாஷ் சங்கம் மற்றும் சர்வதேச தொழில்முறை ஸ்குவாஷ் சங்கம் இணைந்து, 'ஈஸ்டர்ன் ஸ்லாம்' சர்வதேச ஸ்குவாஷ் சாம்பியன்ஷிப் - 2025 போட்டி, அசாம் மாநில தலைநகர் குவஹாத்தில், நவம்பர் 8 முதல் 11 வரை நடந்தது. இதில், இந்தியா உட்பட வெளிநாடுகளைச் சேர்ந்த, 400 வீரர் - வீராங்கனையர் பங்கேற்றனர்.

இதில், 11, 13, 15, 17, 19 வயது பிரிவுகள், ஆடவர், மகளிர் மற்றும் மாஸ்டர்ஸ் பிரிவு என, போட்டிகள் நடத்தப்பட்டன. அனைத்து பிரிவுகளும், நேரடி நாக் - அவுட் முறையில் நடந்தன.

இதன் 19 வயது பிரிவில், இந்தியா சார்பில் போட்டியிட்ட சென்னை எஸ்.ஆர்.எம்., பல்கலையின் ஷமீனா ரியாஸ், 18, அந்த பிரிவில் சாம்பியன் பட்டத்தை கைப்பற்றி அசத்தியுள்ளார்.

இவர், இறுதி போட்டியில், அஞ்சலி செம்வாலை 11 - 9, 13 - 11, 9 - 11, 11 - 4 என்ற புள்ளிகள் அடிப்படையில் வீழ்த்தி, 3 - 1 என்ற செட் கணக்கில் சாம்பியன் பட்டத்தை வென்றார்.