ஆலந்துார் நகராட்சியாக இருந்தபோது, 1996ம் ஆண்டு ஆலந்துார், நங்கநல்லுார், ஆதம்பாக்கம் பகுதிகளை ஒருங்கிணைத்த பாதாள சாக்கடை திட்டம் கொண்டுவரப்பட்டது.

சில ஆண்டுகளாக திட்ட குழாய்களில் ஆங்காங்கே உடைப்பு ஏற்பட்டு, மக்கள் கடுமையாக பாதிக்கப்பட்டனர்.

இதையடுத்து, 123.63 கோடி ரூபாயில், 18 கி.மீ., நீளத்திற்கு புதிய பிரதான குழாய் அமைக்கும் பணி, கடந்த ஆண்டு துவக்கப்பட்டது. அடுத்த இரு மாதங்களில், இத்திட்டம் முடியும் தருவாயில் உள்ளது.

ஆலந்துார், அழகிரி தெருவில், கடந்த மூன்று மாதங்களாக, பூமிக்குள் பழைய குழாய் அகற்றப்பப்பட்டு, புதிய குழாய் பதிக்கும் பணி நடந்தது. இந்நிலையில், புதிதாக போடப்பட்ட குழாயில் உள்ளுக்குள் உடைப்பு ஏற்பட்டு, கழிவுநீர் பூமியில் பரவி மண் சரிய துவங்கியது.

பாதாள சாக்கடை குழாய் புதைக்கும்போது குடிநீர் குழாயில் உடைப்பு ஏற்பட்டுள்ளதாகவும், அதனால் கடந்த ஒரு வாரமாக குடிநீர் சரியாக வரவில்லை எனவும் கூறப்படுகிறது.

இந்நிலையில், நேற்று காலை 20 அடி ஆழத்திற்கு திடீரென சாலை உள்வாங்கியது. இதனால், தெருவில் வசித்த மக்கள், வீடுகளை விட்டு வெளியே வர முடியாமல் பாதிக்கப்பட்டனர்.

தகவல் அறிந்து, மண்டல குழு தலைவர் சந்திரன், மாநகராட்சி, குடிநீர் வாரிய அதிகாரிகள் அங்கு விரைந்தனர்.

உடைந்த குழாயை மாற்றி, சாலை உள்வாங்கிய பகுதியை சீரமைக்கும் பணிகள் துவக்கப்பட்டன.

இதனிடையே பணியை தாமதமாக செய்யும் ஒப்பந்ததாரர் மீது, உரிய நடவடிக்கை எடுக்க வேண்டும் என, மண்டல குழு தலைவர் சந்திரன் குடிநீர் வாரிய அதிகாரிகளிடம் முறையிட்டார்.

இதையடுத்து, ஒரு வார காலத்திற்குள் பள்ளம் சீரமைக்கப்பட்டு, புதிய சாலை அமைக்கப்படும் என, குடியிருப்பு மக்களிடம் அதிகாரிகள் உறுதி அளித்தனர்.