'போலீசாரும், கண்டக்டர்களும் விசில் அடிக்க தடை வரலாம்' த.வெ.க.,வில் மாற்று கட்சியினர் இணையும் நிகழ்ச்சி, பனையூர் அலுவலகத்தில் நேற்று நடந்தது. அதில், கட்சியின் தலைமை நிர்வாக குழு ஒருங்கிணைப்பாளர் செங்கோட்டையன் பேசியதாவது: பிரதமர் மோடி பங்கேற்ற மதுராந்தகம் பொதுக் கூட்டத்தில் போடப்பட்ட 60,000 இருக்கைகளில், 10,000 காலி; 20,000 பேர் யார் பேச்சையும் கேட்காமல் துாங்கி விட்டனர். 'தி.மு.க.,-வை அகற்றுவோம்' என்று பிரதமர் பேசியபோது கூட, அங்கு கைத்தட்டல் இல்லை. ஏனென்றால், தி.மு.க.,வை அகற்ற த.வெ.க-.,வால் தான் முடியும். த.வெ.க.,வுக்கு, 'விசில்' சின்னம் கிடைத்திருப்பதால், இனி போலீசாரையும், பஸ் கண்டக்டர்களையும் விசில் அடிக்க வேண்டாம் என்று சொல்லப் போகின்றனர். இவ்வாறு அவர் பேசினார். தேர்தல் பிரசார பொதுச்செயலர் ஆதவ் அர்ஜுனா பேசியதாவது: தி.மு.க., தற்போது அ.தி.மு.க-.,வாக மாறி விட்டது. யார் எந்த கட்சியில் இருந்து வெளியே வருவர் என காத்திருந்து, கோழி பிடிக்கும் கட்சியாக மாறி விட்டது. உண்மையான தி.மு.க.,வினர் த.வெ.க.,வுக்கு வந்து விட்டனர். நாங்கள் சி.பி.ஐ., விசாரணைக்கு சென்று வந்ததால், பயந்து விட்டதாக சொல்கின்றனர். ஆனால், 'ரெய்டு' வரும்போது, செந்தில் பாலாஜி அழுதது எல்லாருக்கும் தெரியும். அவர் வாய் திறந்தால், முதல்வர் மாட்டிக் கொள்வார். நாங்கள் ஒன்றும் 50,000 கோடி ரூபாயை சுருட்டி வீட்டில் வைக்கவில்லை. இவ்வாறு அவர் பேசினார்.