தம்பதியினருக்கிடையே ஏற்படும் குடும்ப பிரச்னையால், முறைப்படி விவாகரத்து பெறுவதற்கு குடும்ப நீதிமன்றங்களை நாடுகின்றனர். கோவையில் இரண்டு குடும்ப நீதிமன்றங்கள் செயல்படுகின்றன.

இந்நீதிமன்றங்களில் விவாகரத்து, கணவன் அல்லது மனைவியுடன் சேர்த்து வைக்க கோருதல், குழந்தைகள் பாதுகாப்பு கோருதல், ஜீவனாம்சம் உட்பட பல்வேறு நிவாரணம் கேட்டு வழக்குகள் தாக்கல் செய்யப்படுகின்றன.

வழக்குகள் அதிகரிப்பு

விவாகரத்து வழக்குகளில், தினந்தோறும் கோர்ட் வாசலில் காத்திருப்போரில், 25- 30 வயதுக்கு உட்பட்ட இளம் தம்பதிகளே அதிகம்.

திருமணமான சில மாதங்களில், அவர்களுக்கிடையே கருத்து வேறுபாடு ஏற்பட்டு, விவாகரத்து கேட்டு வழக்கு தாக்கல் செய்வது அதிகரித்துள்ளது.

வழக்கு தாக்கல் செய்து, ஆறு மாத காலத்திற்குள் விசாரணை முடித்து உத்தரவு பிறப்பிக்க வேண்டும் என, குடும்ப நல சட்டத்தில் தெரிவிக்கப்பட்டுள்ளது. ஆனால், வழக்குகளின் எண்ணிக்கை அதிகரித்து வருவதால், குறிப்பிட்ட காலத்திற்குள் விசாரணையை முடிப்பதில், தாமதம் ஏற்படுகிறது.

கொரோனாவும் காரணம்

கோவை குடும்ப நீதிமன்றத்தில், 2019ல், 4,000 வழக்கும், 2020 ல், 4,400 வழக்கும் நிலுவையில் இருந்தது. 2021 ல், 5,000 ஆக அதிகரித்தது.

அந்த ஆண்டில் கொரோனா பாதிப்பு ஏற்பட்டதால், விசாரணை முடங்கி நிலுவை வழக்கு மேலும் அதிகரிக்க காரணமானது. 2022, ஜூனுக்கு பிறகு தொடர் விசாரணை நடத்தப்பட்டதால், நிலுவை வழக்கு எண்ணிக்கை முன்பை விட குறைந்தது.

2023ல், 2,500 புதிய வழக்குகள், 2024ல், 2,600 புதிய வழக்குகள் என, மொத்தம், 5,100 வழக்குகள் தாக்கல் செய்யப்பட்டுள்ளன. அதே நேரத்தில், 2023 ல், 2,500 வழக்கு, 2024 ல், 2,000 வழக்கு என மொத்தம், 4,600 வழக்கில் தீர்வு காணப்பட்டுள்ளது.

கடந்தாண்டு வரை, இரண்டு நீதிமன்றங்களில் மொத்தம், 4,000 வழக்குகள் நிலுவையில் உள்ளன. இரண்டு கோர்ட்டுகளில் மாதம்தோறும், சராசரியாக, 200 - 250 வரை புதிய வழக்குகள் தாக்கல் செய்யப்படுகின்றன.